យោងតាមការចេញផ្សាយដោយគេហទំព័រកីឡា BBC បានឱ្យដឹងថា អាមេរិក នឹងធ្វើម្ចាស់ផ្ទះនៃកម្មវិធីបាល់ទាត់ដ៏ធំមួយនេះមានដល់ទៅ ៧៨ ក្នុងចំណោម ១០៤ប្រកួតសរុបជាមួយមិចស៊ិក និងកាណាដា ដោយមាន ៤៨ប្រទេសចូលរួមចាប់ពីថ្ងៃទី១១ ខែមិថុនា ដល់ថ្ងៃទី១៩ ខែកក្កដា ឆ្នាំ២០២៦។ លោក Oke Gottlish មន្រ្តីមកពីសហព័ន្ធបាល់ទាត់អាល្លឺម៉ង់ (DFB) និងជាប្រធានលីគអាជីព Bundesliga ផងនោះ បានស្នើដល់ប្រទេសដទៃដកខ្លួន ឬមិនចូលរួមព្រឹត្តិការណ៍ FIFA World Cup 2026 ក៏ព្រោះតែសកម្មភាពរបស់ប្រធានាធិបតីសហរដ្ឋអាមេរិក លោក Donald Trump នាពេលថ្មីៗនេះ។ ក៏ប៉ុន្តែកាលពីពេលថ្មីៗនេះ ប្រធានាធិបតី ត្រាំ បានគំរាមដល់បណ្តាប្រទេសនៅអឺរ៉ុបមានដល់ទៅ ៨ប្រទេស តាមរយៈការដំឡើងពន្ធគយ ដោយក្នុងនោះក៏មានអាល្លឺម៉ង់ផងដែរ ពីការរារាំងសហរដ្ឋអាមេរិកគ្រប់គ្រងកោះ Greenland ដែលស្ថិតក្នុងដែនអធិបតេយ្យភាពរបស់ប្រទេសដាណឺម៉ាកបច្ចុប្បន្ន។ ទាក់ទិននឹងបញ្ហាដែលកំពុងក្តៅនៅអឺរ៉ុប និងអាមេរិក ដែលជាសមាជិកអង្គការ NATO ដូចគ្នានោះ លោក Oke បានថ្លែងប្រាប់កាសែត Hamburger Morgenpost ថា «ខ្ញុំកំពុងសញ្ជឹងគិត និងចង់ពិភាក្សាជាមួយប្រទេសដទៃ ពីការពហិការ World Cup 2026។ សម្រាប់ខ្ញុំ ពេលវេលាជាក់លាក់ត្រូវបានកំណត់រួចហើយ»។ លោកថា «កន្លងមក សហរដ្ឋអាមេរិកក៏បានដឹកនាំធ្វើពហិការនៅ Olympic Games 1980 ផងដែរ បន្ទាប់ពីសហភាពសូវៀតបានលើកកងទ័ពចូលឈ្លានពានអាហ្វហ្គានីស្ថាន។ តើនរណាជាអាជ្ញាធរនៃរឿងនេះ? តាមគំនិតខ្ញុំ ប្រសិនបើការគំរាមកំហែងនៅតែបន្តខ្លាំងឡើង វាគឺជាពេលវេលាដែលយើងត្រូវពិភាក្សាគ្នា និងសម្រេចចិត្តហើយ»។ ទោះជាបែបនេះក្តី ពុំទាន់មានប្រទេសណាផ្សេងទៀតចូលរួមជាមួយអាល្លឺម៉ង់ឡើយ ដោយកន្លងមកមានរដ្ឋាភិបាលបារាំងបានចេញមកបញ្ជាក់ថ្មីៗនេះថា ពុំមានទំនោរដកខ្លួនឡើយ ហើយដាណឺម៉ាក ម្ចាស់កោះ Greenland ក៏មិនចាប់អារម្មណ៍ និងផ្តោតតែទៅលើការលេងជម្រុះនៅខែមីនាខាងមុខប៉ុណ្ណោះ៕

ព័ត៌មានទាក់ទង