ផ្លូវនានាជុំវិញសាកលវិទ្យាល័យត្រូវបានបិទ ខណៈអាជ្ញាធរអាមេរិក បានរឹតបន្តឹងសន្តិសុខនៅជុំវិញទីក្រុង ស្របពេលដែលពួកគេ កំពុងតាមប្រមាញ់ខ្មាន់កាំភ្លើង ដែលបានរត់គេចខ្លួន ក្រោយធ្វើសកម្មភាពបាញ់ប្រហារ នៅអគារសិក្សាជំនាញវិស្វកម្ម Barus & Holley របស់សាកលវិទ្យាល័យ Brown ជាទីដែលការប្រឡងកំពុងតែប្រព្រឹត្តទៅនាពេលនោះ។ នាថ្ងៃសៅរ៍ ទី១៣ ខែធ្នូ ករណីបាញ់ប្រហារមួយបានកើតឡើង នៅសាកលវិទ្យាល័យ Brown University ក្នុងទីក្រុង Providence រដ្ឋ Rhode Island នៃសហរដ្ឋអាមេរិក ហើយបានបណ្តាលឱ្យមនុស្ស២នាក់ បាត់បង់ជីវិត និង៨នាក់ផ្សេងទៀតរងរបួសធ្ងន់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ គួរបញ្ជាក់ថា បើប្រៀបធៀបជាមួយប្រទេសជាច្រើនផ្សេងទៀត ករណីបាញ់ប្រហារទ្រង់ទ្រាយធំនៅតាមសាលារៀន កន្លែងធ្វើការ និង​កន្លែងគោរពប្រតិបត្តិសាសនា គឺជារឿងកើតមានឡើងយ៉ាងញឹកញាប់នៅក្នុងសហរដ្ឋអាមេរិក ដែលជាប្រទេសមានច្បាប់កាន់កាប់កាំភ្លើងដ៏ធូររលុងបំផុតមួយ នៅក្នុងចំណោមប្រទេសអភិវឌ្ឍន៍។ អង្គការ Gun Violence Archive បានកំណត់និយមន័យការបាញ់ប្រហារទ្រង់ទ្រាយធំថា គឺជាករណីទាំងឡាយណា ដែលមានជនរងគ្រោះចាប់ពី៤នាក់ឡើងទៅ រងការបាញ់ប្រហារ។ បើតាមអង្គការនេះ ក្នុងឆ្នាំ២០២៥ មានករណីបាញ់ប្រហារទ្រង់ទ្រាយធំសរុប៣៨៩ករណី នៅសហរដ្ឋអាមេរិក ក្នុងនោះរួមមានយ៉ាងហោច៦ករណី កើតឡើងនៅតាមសាលារៀន។ សម្រាប់កាលពីឆ្នាំ២០២៤វិញ សហរដ្ឋអាមេរិក មានករណីបាញ់ប្រហារទ្រង់ទ្រាយធំលើស៥០០ករណី៕

ព័ត៌មានទាក់ទង