រូបភាពច្នៃដោយ AI ដែលសារព័ត៌មាន The Nation យកទៅផ្សព្វផ្សាយនេះ គឺជារូប​ប្រជា​ពលរដ្ឋខ្មែរនៅភូមិព្រៃចាន់ រងរបួសដោយការបាញ់ប្រហាររបស់ទាហានថៃ​នាថ្ងៃ​ទី​១២ ខែវិច្ឆិកា ឆ្នាំ២០២៥ ហើយកំពុងសម្រាកព្យាបាលរបួសនៅក្នុងមន្ទីរពេទ្យ។ រូបភាព​ពិតប្រាកដបុរសដែលរងរបួសដេកលើគ្រែពេទ្យមិនមានស្នាមញញឹមនោះឡើយ តែរូប​ភាពផ្សាយដោយ The Nation ត្រូវបានគេច្នៃដោយ AI ធ្វើឱ្យមានស្នាមញញឹម។ The Nation សារព័ត៌មានដ៏ធំមួយរបស់ប្រទេសថៃ បានបោះបង់តម្លៃ​សីល​ធម៌​វិជ្ជាជីវៈសារព័ត៌មាន យករូបភាពច្នៃដោយ AI ទៅផ្សព្វផ្សាយបង្កើតការភ័ន្តច្រឡំ។ ក្រោយមានហេតុការណ៍ទាហានថៃ បាញ់ប្រហារមកលើប្រជាពលរដ្ឋខ្មែរ មានអ្នកប្រើ​ប្រាស់បណ្តាញសង្គមក្នុងប្រទេសថៃ បានព្យាយាមយករូបភាពពលរដ្ឋខ្មែរដែលរងរបួស​ទៅ​កែច្នៃដោយប្រើប្រាស់បច្ចេកវិទ្យា AI ធ្វើឱ្យផ្ទៃមុខរបស់ពួកគេមានស្នាមញញឹម។ ការ​ធ្វើបែបនេះ ពួកគេចង់បំភ័ន្តសាធារណៈមតិថា ការរងរបួសរបស់ប្រជាពលរដ្ឋខ្មែរនោះ ជាឈុតឆាកសម្តែង។ ទង្វើគេច្នៃរូបភាពពីសំណាក់ពលរដ្ឋថៃ ហើយចែកចាយលើបណ្តាញសង្គម ជាទង្វើ​មួយ​បង្ហាញពីភាពជ្រុលនិយម និងខ្វះភាពថ្លៃថ្នូរ។ ប៉ុន្តែសម្រាប់វាជាកំហុសឆ្គងមួយដ៏​ធ្ងន់​ធ្ងរ​​សម្រាប់សារព័ត៌មាន The Nation ដែលយករូបភាពនេះទៅចែកចាយបន្ត​ដោយ​មិ​នផ្ទៀតផ្ទាត់ឱ្យបានច្បាស់លាស់មុនយកទៅផ្សព្វផ្សាយ។ នេះក៏ជាទង្វើខ្វះ​ការ​យកចិត្តទុកដាក់លើវិជ្ជាជីវៈសារព័ត៌មានផងដែរ។ ការផ្សព្វផ្សាយព័ត៌មាន រូបភាព ឬវីដេអូ ដែលមិនពិត គឺជាត្រណមដ៏ធំសម្រាប់​ក្រម​សីល​ធម៌​វិជ្ជាជីវៈសារព័ត៌មាន ហើយដែលបណ្តាប្រទេសនានា កំពុងរួមគ្នាប្រយុទ្ធ​ប្រឆាំងនឹងសកម្មភាពផ្សព្វផ្សាយព័ត៌មានមិនពិតនេះផងដែរ។ ការផ្សព្វផ្សាយរូបភាពច្នៃដោយ AI ពីសំណាក់សារព័ត៌មាន The Nation របស់ថៃ ធ្វើឱ្យប៉ះពាល់ធ្ងន់ធ្ងរដល់ក្រមសីលធម៌វិជ្ជាជីវៈសារព័ត៌មាន និងជាការមិនខ្វល់ដល់​កិច្ច​ប្រឹងប្រែងរបស់​ប្រទេសនានាក្នុងការប្រយុទ្ធប្រឆាំងនឹងព័ត៌មានក្លែងក្លាយ។ ការផ្សាយ​បែបនេះ ធ្វើឱ្យប៉ះពាល់ដល់សេចក្តីថ្លៃថ្នូរ ហើយធ្វើឱ្យមានការយល់ច្រឡំកាន់តែខ្លាំង​ចំពោះសាធារណមតិនៅក្នុងប្រទេសថៃ ហើយបង្កើតឱ្យមានអរិភាពកាន់តែខ្លាំងរវាងកម្ពុជា និងថៃ ក្នុងគ្រាប្រទេសទាំងពីរមានបញ្ហាព្រំដែនរវាងគ្នា៕

ព័ត៌មានទាក់ទង