រាជធានីភ្នំពេញពិធីបើកជើងហោះហើរថ្មីរបស់ក្រុមហ៊ុនជាតិ ពីរាជធានីភ្នំពេញទៅកាន់ទីក្រុងតូក្យូ ប្រទេសជប៉ុន ដោយឆ្លងកាត់ទីក្រុងហ្វូចូវ ប្រទេសចិននេះ បានរៀបចំធ្វេីឡេីងក្រោមអធិបតីភាពលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិកាដ្ឋានអាកាសចរណ៍ស៊ីវិល និងជាប្រធានក្រុមប្រឹក្សាភិបាលក្រុមហ៊ុនអាកាសចរណ៍ជាតិកម្ពុជា។ ក្រោមកិច្ចខិតខំប្រឹងប្រែង របស់រាជរដ្ឋាភិបាលកម្ពុជា នៅព្រឹកថ្ងៃទី២៦ ខែតុលា ឆ្នាំ២០២៥នេះ ក្រុមហ៊ុនអាកាសចរណ៍ជាតិកម្ពុជា (Air Cambodia) បានចាប់ផ្ដើមបើកជើងហោះហើរត្រង់ថ្មី ពីទីក្រុងភ្នំពេញ ទៅកាន់ទីក្រុងតូក្យូ ប្រទេសជប៉ុន។ ក្នុងពិធីបើកជើងហោះហើរលើកដំបូងនេះ ក៏មានការចូលរួមពីសំណាក់លោក ATSUSHI UENO ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងលោក ហួត ហាក់ រដ្ឋមន្ត្រីក្រសួងទេសចរណ៍ ព្រមទាំងថ្នាក់ដឹកនាំ រដ្ឋលេខាធិការដ្ឋានអាកាសចរណ៍ស៉ីវិល ក្រសួងការបរទេស និងសហប្រតិបត្តិការអន្តរជាតិ ស្ថានទូតវៀតណាមប្រចាំនៅកម្ពុជា ក្រសួងទេសចរណ៍ និងក្រុមហ៊ុនវិនិយោគអាកាសយានដ្ឋាន CAIC និងភ្នាក់ងារទេសចរណ៍។ នេះជាសមិទ្ធិផលថ្មីមួយទៀត ដែលក្រុមហ៊ុនជាតិបានពង្រីកវិសាលភាពរបស់ខ្លួន ទៅកាន់អាស៊ីបូព៌ាកាន់តែឆ្ងាយ ដែលបង្ហាញអំពីវឌ្ឍនភាពរបស់ក្រុមហ៊ុនអាកាសចរណ៍ជាតិកម្ពុជា ក៏ដូចជាការរួមចំណែកដល់វិស័យដឹកជញ្ជូនទំនាក់ទំនង វប្បធម៌ ប្រពៃណី ពាណិជ្ជកម្ម និងការវិនិយោគរវាងកម្ពុជា និងជប៉ុនព្រមទាំងនាំកម្ពុជាឱ្យពិភពលោកស្គាល់កាន់តែច្បាស់ថែមទៀត។ មិនត្រឹមតែប៉ុណ្ណោះអាកាសចរណ៍ជាតិក៏ពិតជាបានរួមចំណែករុញកំណើនសេដ្ឋកិច្ចកម្ពុជាផងដែរ គឺតាមរយៈការដឹកជញ្ជូនតាមផ្លូវអាកាសនេះ បាននាំទេសចរណ៍ពាណិជ្ជកម្ម វិនិយោគិនទំនិញជាដើម -ល-។ ការបើកជើងហោះហើរត្រង់ថ្មីនេះ ស្របតាមទិសដៅ និងយុទ្ធសាស្ត្រ របស់រាជរដ្ឋាភិបាលកម្ពុជា ក្នុងការពង្រីកការតភ្ជាប់អាកាស និងលើកកម្ពស់វិស័យទេសចរណ៍ ពាណិជ្ជកម្ម វិនិយោគ និងវប្បធម៌ តាមរយៈការបើកបម្រើបណ្តាជើងហោះហើរថ្មីៗ ទៅកាន់ទីផ្សារសំខាន់ៗ នៅក្រៅប្រទេស។ ជើងហោះហើរភ្នំពេញ-ទីក្រុងហ្វ៊ូចូវ-ទីក្រុងតូក្យូ (PNH–FOC–NRT) នេះ បានផ្តល់ភាពងាយស្រួល ក្នុងការធ្វើដំណើរជាមួយ ពេលវេលាប្តូរយន្តហោះខ្លី តាមរយៈទីក្រុងហ្វ៊ូចូវ ដោយជួយកាត់បន្ថយការរង់ចាំយូរ និងធ្វើឱ្យការធ្វើដំណើររវាងកម្ពុជា និងជប៉ុន រហ័ស សមស្រប និងមានប្រសិទ្ធភាព។ ក្រុមហ៊ុនអាកាសចរណ៍ជាតិកម្ពុជា គឺជាក្រុមហ៊ុនអាកាសចរណ៍ដំបូងគេ ដែលផ្តល់ការហោះហើរត្រង់ពីទីក្រុងភ្នំពេញ ទៅកាន់ប្រទេសជប៉ុន តាមរយៈទីក្រុងហ៊្វូចូវ។ ជើងហោះហើរនេះ ចំណាយពេលប្រហែល ៧ម៉ោង៖៣០នាទី ជាមួយនឹងការឈប់សម្រាក៥០នាទី នៅទីក្រុងហ្វ៊ូចូវ។ ជើងហោះហើរនេះ ប្រើប្រាស់យន្តហោះប្រភេទ អ៊ែរបើស (Airbus) ៣២០/៣២១ ដែលបានកំណត់រចនាសម្ព័ន្ធជាមួយនឹងកៅអី ដឹកអ្នកដំណើរចំនួន ១៧០/១៧៨ (ចែកជា២ថ្នាក់ កៅអី៖ កៅអីធម្មតា និងកៅអីថ្នាក់ធុរកិច្ច)។ សម្រាប់ការឈប់សម្រាកនៅទីក្រុងហ្វ៊ូចូវ អ្នកដំណើរមិនតម្រូវឱ្យចុះពីយន្តហោះ មិនតែប៉ុណ្ណោះ ក៏មិនតម្រូវឱ្យមានទិដ្ឋាការនោះទេ។ អ្នកដំណើរដែលមានលិខិតឆ្លងដែនខ្មែរ ទទួលបានអត្ថប្រយោជន៍យ៉ាងពិសេស គឺទទួលបានវ៉ាលី Check-in បន្ថែម សរុបរួមទាំងអស់២វ៉ាលី (មិនលើសពី២៣គីឡូក្រាមក្នុង១វ៉ាលី) ហើយអ្នកដំណើរទាំងកៅអីធម្មតា និងកៅអីថ្នាក់ធុរកិច្ច ទទួលបានការបម្រើសេវាកម្មអាហារ នៅលើយន្តហោះសម្រាប់ជើងហោះហើរថ្មី រវាងកម្ពុជា និងជប៉ុន។ សូមបញ្ជាក់ផងដែរថា ជើងហោះហើរនេះ មានបម្រើជូន ៣ជើងក្នុងមួយសប្តាហ៍ ដែលមានជើងហោះហើរលេខ K6592 ចេញពីភ្នំពេញម៉ោង ០៩៖៤០ ទៅដល់តូក្យូម៉ោង ១៩៖០០ ហើយត្រឡប់វិញជាមួយជើងហោះហើរលេខ K6593 ពីតូក្យូនៅម៉ោង ២០៖០០ មកដល់ភ្នំពេញនៅម៉ោង ០២៖៥៥៕

ព័ត៌មានទាក់ទង