ទីភ្នាក់ងារព័ត៌មានបានរាយការណ៍ថា ធនាគារ Bank of India ធនាគារ Union Bank ធនាគារ ICICI Bank ធនាគារ Canara Bank ធនាគារ IDBI និងធនាគារ RBL ដែលប្រឈមទៅនឹងក្រុមហ៊ុន Adani Group តិចជាងធនាគារ SBI ក៏កំពុងអនុវត្តកិច្ចការស្រដៀងគ្នានេះផងដែរ។ ធនាគារិក ៨នាក់ដែលស្នើសុំមិនបញ្ចេញអត្តសញ្ញាណបាននិយាយថា ធនាគារនានានៅប្រទេសឥណ្ឌា រួមទាំងធនាគារ State Bank of India (SBI) កំពុងពិនិត្យមើលការប្រឈមរបស់ពួកគេទៅនឹងក្រុមហ៊ុន Adani Group និងពិនិត្យមើលថាតើពួកគេត្រូវរឹតបន្តឹងការពិនិត្យមើលរបស់ខ្លួននៅពេលផ្តល់ប្រាក់កម្ចីថ្មីឱ្យក្រុមហ៊ុននេះដែរឬយ៉ាងណា បន្ទាប់ពីសហរដ្ឋអាមេរិកបានចោទប្រកាន់លោក Gautam Adani ពីបទស៊ីសំណូក។ ការពិនិត្យឡើងវិញណាមួយដែលត្រូវធ្វើឡើងនឹងមិនតម្រូវឱ្យមានការផ្លាស់ប្តូរណាមួយនៅក្នុងវិធីសាស្រ្តឥណទានរបស់ធនាគារទាំងនោះទាក់ទងនឹងក្រុមហ៊ុន Adani Group ទេ។ ប្រភពមកពីអាជ្ញាធរផ្នែកបទប្បញ្ញត្តិដែលដឹងពីបញ្ហានេះបានប្រាប់ទីភ្នាក់ងារព័ត៌មានរ៉យទ័រថា មើលពីជ្រុងប្រព័ន្ធធនាគារវិញ មិនចាំបាច់ភ័យស្លន់ស្លោទេព្រោះគ្មានធនាគារណាមួយនៅក្នុងពេលនេះប្រឈមខ្លាំងទៅនឹងក្រុមហ៊ុន Adani Group ឡើយ។ យោងតាមក្រុមហ៊ុនឈ្មួញជើងសារ IIFL Securities បានឱ្យដឹងថា ធនាគារ SBI ប្រឈមខ្លាំងជាគេទៅនឹងក្រុមហ៊ុន Adani Group ក្នុងចំណោមធនាគារនៅប្រទេសឥណ្ឌា ដោយបានផ្តល់កម្ចីចំនួន ៣៣៨ពាន់លានរូពី (៤ពាន់លានដុល្លារ)។ ប្រភពនានាបានប្រាប់រ៉យទ័រថា ធនាគារ SBI នឹងមិនបញ្ឈប់ការផ្តល់ប្រាក់កម្ចីរបស់ខ្លួនដល់គម្រោងនានាដែលកំពុងដំណើរការជិតចប់របស់ក្រុមហ៊ុន Adani ទេ ប៉ុន្តែប្រភពដដែលនេះបានបន្ថែមថា ធនាគារ SBI នឹងអនុវត្តការពិនិត្យមើលឡើងវិញដោយប្រុងប្រយ័ត្នខណៈពេលដែលបញ្ចេញប្រាក់កម្ចីដើម្បីធានាថា ក្រុមហ៊ុន Adani ឆ្លើយតបទៅនឹងលក្ខខណ្ឌកម្ចីទាំងអស់៕

ព័ត៌មានទាក់ទង