នាយកប្រតិបត្តិ (CEO) ក្រុមហ៊ុន Apple លោក Tim Cook បានប្រកាសក្នុងអំឡុងពេលហៅរកប្រាក់ចំណូលសម្រាប់ត្រីមាសទី៤ ឆ្នាំ២០២៤ ថា «នៅក្នុងខែមេសាខាងមុខនេះ ក្រុមហ៊ុន Apple នឹងនាំយកភាសាជាច្រើនទៀត រួមមាន បារាំង អាល្លឺម៉ង់ អ៊ីតាលី ព័រទុយហ្គាល់ អេស្បាញ ជប៉ុន កូរ៉េ ចិន ក៏ដូចជាភាសាអង់គ្លេសដែលបានធ្វើមូលដ្ឋានីយកម្មនៅប្រទេសសិង្ហបុរី និងឥណ្ឌា (ភាសាអង់គ្លេសនិយាយបែបសិង្ហបុរី និងឥណ្ឌា)»។ ខណៈពេលនោះ ត្រូវបានគេកត់សម្គាល់ថា លោក Cook បានលើកឡើងមាន ៨ភាសា ហើយក្នុងនោះក៏មានរួមបញ្ចូលវៀតណាមផងដែរ។ ដូចដែលប្រិយមិត្តបានជ្រាបរួចមកហើយថា ក្រុមហ៊ុនបច្ចេកវិទ្យាយក្ស Apple បានដាក់ដំណើរការបញ្ញាសិប្បនិម្មិត Apple Intelligence ជាលើកដំបូងរបស់ខ្លួននៅក្នុង iPhone 16 កាលពីខែតុលាឆ្នាំមុន ប៉ុន្តែអនុញ្ញាតឱ្យគាំទ្រតិចភាសាប៉ុណ្ណោះ ជាពិសេសភាសាអង់គ្លេស។ យ៉ាងណាមិញ តាមរយៈការប្រកាសរបស់មេធំ Apple នាពេលថ្មីៗនេះ នឹងអនុញ្ញាតឱ្យគាំទ្រក្នុងចំនួនច្រើនភាសា ច្រើនប្រទេសក្នុងពេលឆាប់ៗខាងមុខ។ នេះបើយោងតាមការចេញផ្សាយដោយ GSMArena។ គួរជម្រាបថា ភាសាទាំងនេះ នឹងត្រូវបានផ្តល់ជូនក្នុងខែមេសាតាមរយៈការធ្វើបច្ចុប្បន្នភាពកម្មវិធី។ Apple Intelligence បច្ចុប្បន្នមាននៅក្នុងសហរដ្ឋអាមេរិក ចក្រភពអង់គ្លេស អូស្ត្រាលី កាណាដា អៀរឡង់ នូវែលសេឡង់ និងអាហ្វ្រិកខាងត្បូង ដែលដំណើរការប្រព័ន្ធប្រតិបត្តិការ iOS 18.2, iPadOS 18.2 និង macOS Sequoia 15.2។ ដោយឡែកសម្រាប់ប្រើប្រាស់ iPhone ក្នុងប្រទេសកម្ពុជាយើង Apple នៅមិនទាន់អនុញ្ញាតឱ្យគាំទ្រភាសានោះទេ៕

ព័ត៌មានទាក់ទង