ផ្អែកលើប្រភពពីទីភ្នាក់ស៉ើបការណ៍សម្ងាត់ជាតិ (NIS) សមាជិកគណៈកម្មាធិការស៉ើបការណ៍សម្ងាត់នៃសភា លោក Lee Seong-kweun បានប្រាប់ប្រព័ន្ធផ្សព្វផ្សាយក្នុងស្រុកថា កូរ៉េខាងជើង ក៏បានដឹកជញ្ជូនអាវុធបន្ថែម សម្រាប់សង្គ្រាមអ៊ុយក្រែន រួមទាំងប្រព័ន្ធកាំភ្លើងធំ howitzer និងប្រព័ន្ធបាញ់រ៉ុក្កែតជាច្រើនគ្រឿងផងដែរ។ លោកបន្ថែមថា ទីភ្នាក់ងារចារកម្ម នៅតែព្យាយាមកំណត់ចំនួនពិតប្រាកដ នៃទាហានកូរ៉េខាងជើងដែលបានស្លាប់ និងថាតើមានអ្នកសុំចុះចាញ់ឬទេ អំឡុងពេលប្រយុទ្ធគ្នា។ សមាជិកសភាកូរ៉េខាងត្បូង បាននិយាយថា កងទ័ពកូរ៉េខាងជើងប្រហែល ១០,៩០០នាក់ ត្រូវបានដាក់ពង្រាយទៅកាន់តំបន់ Kursk ជាផ្នែកមួយនៃអង្គភាពទ័ពឆត្រយោង និងកងម៉ារីនរបស់រុស្ស៉ី ដោយមួយចំនួនបានចូលរួម ក្នុងសមរភូមិសង្គ្រាមអ៊ុយក្រែនរួចហើយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃពុធ ទី២០ ខែវិច្ឆិកា ឆ្នាំ ២០២៤។ បើតាមសមាជិកគណៈកម្មាធិការស៉ើបការណ៍សម្ងាត់មួយរូបទៀត គឺលោក Park Sun-won ជំនួបរវាងលោក ពូទីន និងរដ្ឋមន្រ្តីការបទេសកូរ៉េខាងជើង លោកស្រី Choe Son Hui នៅទីក្រុងមូស្គូ ក្នុងខែនេះ ទំនងជាលើសពីការរ៉ាក់ទាក់ធម្មតា ហើយ​អាចគ្រប់ដណ្តប់លើបញ្ហា​សំខាន់ៗ​ រួម​ទាំង​លទ្ធភាពដំណើរទស្សនកិច្ច នៃមេដឹកនាំ ​លោក គីម ជុងអ៊ុន ទៅ​កាន់​ប្រទេស​រុស្ស៉ីម្តងទៀត៕

ព័ត៌មានទាក់ទង