រាជធានីភ្នំពេញ៖លោកជំទាវអ្នកឧកញ៉ា ម៉ៅ ចំណាន បានបន្ថែមថា ព្រឹត្តិការណ៍នេះ គឺជាសមិទ្ធផលថ្មីមួយទៀតបន្ថែមលើសមិទ្ធផលជាច្រើន ដែលសមាគមសិល្បករខ្មែរ សម្រេចបានក្នុងរយៈពេលជាង៣ខែកន្លងមកនេះ បន្ទាប់ពីលោកជំទាវអ្នកឧកញ៉ា ត្រូវបានជាប់ឆ្នោតជ្រើសតាំងជាប្រធានសមាគមមក។ ព្រឹត្តិការណ៍នេះទៀតសោត គឺជាការរួមចំណែកបង្កើតស្នាដៃផ្សព្វផ្សាយវប្បធម៌ បរិយាកាស និងស្នាមញញឹមជូនដល់ ភ្ញៀវទេសចរណ៍ជាតិ-អន្តរជាតិ និងជាផ្នែកមួយជួយដល់កំណើនសេដ្ឋកិច្ចជាតិផងដែរ។ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ អាណត្តិទី៦ បានថ្លែងបញ្ជាក់ថា កម្មវិធី «ស្នាមញញឹមនៃកម្ពុជា» គឺជាព្រឹត្តិការណ៍ដែលសិល្បករ-សិល្បការិនី ទាំងអស់មកជួបជុំគ្នានៅលើដែនដីអង្គរតែមួយ រយៈពេល៣ថ្ងៃ ក្នុងគោលបំណងរួមគ្នា ផ្សព្វផ្សាយអំពីសុជីវធម៌ វប្បធម៌ ប្រពៃណី ទំនៀមទម្លាប់ ប្រាង្គប្រាសាទ និងតំបន់ទេសចរណ៍ល្បីៗក្នុងតំបន់អង្គររបស់កម្ពុជា ទៅកាន់ភ្ញៀវទេសចរជាតិ និងអន្តរជាតិ ដែលគោលបំណងរួមមួយនេះ គឺជំរុញ និងលើកតម្កើងសក្តានុពលទេសចរណ៍នៅកម្ពុជា​។ អាចនិយាយបានថា ព្រឹត្តិការណ៍ «ស្នាមញញឹមកម្ពុជា» គឺជាការផ្តល់ឱកាសឲ្យសិល្បករ-សិល្បការិនី ដែលមានឈ្មោះល្បីនៅលើបណ្តាញសង្គម និងអ្នកជំនាញបង្កើតមាតិកាល្អៗ មកជួបជុំគ្នានៅលើដែនដីអង្គរដ៏អស្ចារ្យ ដោយមានគោលដៅក្នុងការផលិតមាតិកាវីដេអូខ្លីៗ ស្តីអំពីសុជីវធម៌ វប្បធម៌ ប្រពៃណី ទំនៀមទម្លាប់ និងតំបន់ទេសចរណ៍ល្បីៗក្នុងតំបន់អង្គរ ដើម្បីផ្សព្វផ្សាយទៅកាន់ពិភពលោក។ លោកជំទាវអ្នកឧកញ៉ាបញ្ជាក់ថា «គ្រប់ពេលដែលនាងខ្ញុំបានមកដល់ខេត្តសៀមរាបទឹកដីអង្គរ នាងខ្ញុំហាក់មានអារម្មណ៍រំភើប និងស្ងប់ស្ញែង ជាទីបំផុតរកអ្វីប្រៀបស្មើពុំបាន ចំពោះស្នាដៃដ៏អស្ចារ្យរបស់មហាបុព្វបុរសដូនតាខ្មែរ ដែលបានកសាងឡើងនូវខឿនវប្បធម៌ អរិយធម៌ ដ៏រឹងមាំ ពិសេសប្រាសាទអង្គរវត្ត ដែលជាអច្ឆរិយវត្ថុគ្មានពីរលើលោក។ ដើម្បីជាការដឹងគុណដល់បុព្វបុរសខ្មែរ នាងខ្ញុំសុំចូលខ្លួនដឹកនាំក្រុមការងារ សិល្បក-រសិល្បការិនី ដែលជាអ្នកបន្តវេន រួមគ្នាថែរក្សា ការពារ និងផ្សព្វផ្សាយពីកេរដំណែលដ៏មហិមារបស់ដូនតា ឱ្យបានស្ថិតស្ថេរគង់វង្សយូរអង្វែង ជានិច្ចនិរន្តន៍ និងល្បីសុះសាយនៅលើសកលលោក»។ ជាមួយនឹងស្មារតីជាតិនិយមនេះហើយ ទើបជំរុញឲ្យលោកជំទាវអ្នកឧកញ៉ា រៀបចំព្រឹត្តិការណ៍ «ស្នាមញញឹមកម្ពុជា» នេះឡើង ដោយមានកិច្ចសហការពីស្ថាប័នពាក់ព័ន្ធនានា និងក្រោមវត្តមានគាំទ្រដ៏ខ្ពង់ខ្ពស់របស់ សម្តេចកិត្តិសង្គហបណ្ឌិត ម៉ែន សំអន ជាគណៈធិបតី ព្រមទាំងសិល្បករ-សិល្បការិនី ជាច្រើនរូប ដែលនេះសបញ្ជាក់ឲ្យឃើញ ពីស្មារតីស្នេហាជាតិ របស់កូនខ្មែរជំនាន់នេះ។​ ដូច្នេះការរួមគ្នា ផលិតមាតិកាវីដេអូពិសេសៗ ក្នុងព្រឹត្តិការណ៍ «ស្នាមញញឹមកម្ពុជា» រយៈពេល៤ថ្ងៃនេះ គឺជាស្មារតីស្នេហាជាតិមួយ ក៏ដូចជាការរួមចំណែក របស់សមាគមសិល្បករខ្មែរ និងបងប្អូនជនរួមជាតិ ជាមួយនឹងរាជរដ្ឋាភិបាល ក្នុងការផ្សព្វផ្សាយ វិស័យសិល្បៈ វប្បធម៌ និងទេសចរណ៍ ដើម្បីជំរុញឲ្យមានកំណើន ភ្ញៀវទេសចរណ៍ជាតិ និងអន្តរជាតិ ធ្វើដំណើរកំសាន្តមកកាន់ប្រទេសកម្ពុជា។ យ៉ាងណាមិញ បើយើងមើលឲ្យស៊ីជម្រៅជាងនេះ កម្មវិធី «ស្នាមញញឹមកម្ពុជា» មិនត្រឹមតែជាការរួមចំណែកជាមួយរាជរដ្ឋាភិបាលប៉ុណ្ណោះទេ ថែមទាំងជាចលនានៃការបំផុសគំនិតជាតិនិយម បំផុសឱ្យបងប្អូនខ្មែរយើងចេះស្រឡាញ់ ថែរក្សាមរតក វប្បធម៌ជាតិខ្មែរ និងរួមគ្នា ផ្សព្វផ្សាយទៅកាន់ពិភពលោក តាមរយៈការផលិតមាតិកាវីដេអូ អប់រំ សិល្បៈ វប្បធម៌ ម្ហូបអាហារ តំបន់ទេសចរណ៍ ភោជនីយដ្ឋាន សណ្ឋាគារជាដើមនៅក្នុងប្រទេសកម្ពុជា។ ក្នុងឱកាសនេះដែរ សម្តេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាផ្ទាល់ព្រះមហាក្សត្រមានប្រសាសន៍ បានថ្លែងកោតសរសើរដោយស្មោះ និងវាយតម្លៃខ្ពស់ចំពោះការខិតខំប្រឹងប្រែង សមាគមសិល្បករខ្មែរ ដែលតែងតែចូលរួមលើកស្ទួយវិស័យវប្បធម៌សិល្បៈរបស់ជាតិយើង ជាពិសេសសមាគមសិល្បករខ្មែរ អាណត្តិទី៦ ដែលមានលោកជំទាវអ្នកឧកញ៉ា ម៉ៅ ចំណាន ជាប្រធាន រួមជាមួយបងប្អូនសិល្បករ-សិល្បការិនី ដែលបានខិតខំចូលរួមនឹងសម្រេចបាននូវសមិទ្ធផលជាបន្តបន្ទាប់ ក្នុងការបង្កើតនូវស្នាដៃថ្មីៗ ដើម្បីផ្សព្វផ្សាយអំពីវប្បធម៌សិល្បៈបង្កើតនូវបរិយាកាសនិងស្នាមញញឹម ដល់ភ្ញៀវទេសចរនានា ដែលអញ្ជើញមកទស្សនានៅព្រះរាជាណាចក្រកម្ពុជា ។ សម្តេចកិត្តិសង្គហបណ្ឌិត បានពិនិត្យឃើញថា ទើបតែជាង៣ខែប៉ុណ្ណោះ លោកជំទាវអ្នកឧកញ៉ា ម៉ៅ ចំណាន ជាប្រធាន បានចេញដំណើរដឹកនាំយ៉ាងស្វាហាប់ និងរឹងមាំគ្រប់ជំហាន។ ជាក់ស្តែងព្រឹត្តិការណ៍ «ស្នាមញញឹមនៃកម្ពុជា» ដែលសមាគមសិល្បករខ្មែរយើងបានរៀបចំនាឱកាសនេះ ជាសក្ខីភាពមួយដែលបង្ហាញពីស្នាមញញឹមនៃប្រជាពលរដ្ឋខ្មែរទៅកាន់ពិភពលោក ក៏ដូចជាសម្រស់ដ៏ស្រស់ត្រកាលនៃប្រាង្គប្រាសាទខ្មែរ ជាតំណាងនៃអរិយធម៌ដ៏រុងរឿងរបស់បុព្វបុរសខ្មែរដ៏សម្បូរបែប រួមទាំងទំនាក់ទំនងយ៉ាងស៊ីជម្រៅជាមួយ សីលធម៌សង្គម ដែលជានិមិត្តរូបនៃស្មារតីឯកភាពជាតិ យូរអង្វែងបន្តពីដូនតារបស់យើង។ ក្នុងឱកាសនោះ សម្តេចកិត្តិសង្គហបណ្ឌិតបានប្រសាសន៍បញ្ជាក់យ៉ាងច្បាស់ថា កាលពីអតីតកាលកម្ពុជា ពោរពេញដោយសង្គ្រាម ពុំមានអ្នកណាមានសិទ្ធសេរីភាព រងនូវការកាប់សម្លាប់ បែកបាក់និរាសព្រាត់ប្រាស់គ្រួសារ គ្មានទេស្នាមញញឹម ។ ដោយឡែក ព្រឹត្តិការណ៍ថ្ងៃនេះកើតចេញពីប្រទេសមានសុខសន្តិភាព ទើបមានកម្មវិធី ស្នាមញញឹមនៃកម្ពុជាថ្ងៃនេះ ដែលផ្នែកមួយនៃគោលនយោបាយ និងទិសដៅការទស្សនាខេត្តសៀមរាបឆ្នាំ២០២៤ ដែលបានដាក់ចេញដោយ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាកាលពីដើមឆ្នាំកន្លងទៅ ដើម្បីជម្រុញវិស័យ ទេសចរណ៍ នៅខេត្តសៀមរាបឲ្យងើបឡើងវិញ បន្ទាប់ពីរងផលប៉ះពាល់ដោយសារជម្ងឺកូវីដ១៩។ គួរបញ្ជាក់ថា ព្រឹត្តិការណ៍ «ស្នាមញញឹមនៃកម្ពុជា» គឺជាព្រឹត្តិការណ៍នៃការជួបជុំសិល្បករ-សិល្បការិនី បុគ្គលដែលមានឈ្មោះល្បីនៅលើបណ្តាញសង្គម និងអ្នកជំនាញបង្កើតមាតិកាល្អៗ មកស្ថិតនៅលើដែនដីអង្គរតែមួយ ក្នុងបំណងរួមគ្នា ផលិតមាតិកាវីដេអូខ្លីៗ ស្តីអំពីសុជីវធម៌ វប្បធម៌ ប្រពៃណី ទំនៀមទម្លាប់ និងតំបន់ទេសចរណ៍ល្បីៗក្នុងតំបន់អង្គរ ដើម្បីបង្ហាញពីសក្តានុពលទេសចរណ៍វប្បធម៌ ធម្មជាតិរបស់កម្ពុជា ទៅកាន់ភ្ញៀវទេសចរជាតិ និងអន្តរជាតិ។ នៅក្នុងព្រឹត្តិការណ៍ «ស្នាមញញឹមកម្ពុជា» នៅថ្ងៃទី ១៥ ខែសីហា ឆ្នាំ២០២៤ មានការរៀបចំនូវម្ហូបអាហារជាច្រើន ជាម្ហូបរបស់ខ្មែរ ជូនទៅដល់ភ្ញៀវជាតិ និងអន្តរជាតិបានភ្លក់រសជាតិអាហារដ៏ឈ្ងុយឆ្ងាញ់ដែលរៀបចំជូនដោយចុងភៅដែលបានចូលរួមសហការដោយមិនគិតប្រាក់ សម្រាប់ភ្ញៀវកិត្តិយស ៥០០នាក់ នៅទីតាំងប្រារព្ធកម្មវិធី«ស្នាមញញឹមនៃកម្ពុជា» មុខប្រាសាទអង្គរ។ នៅថ្ងៃទី១៥ ខែសីហា នេះ សមាគមសិល្បករខ្មែរ មានរៀបចំពិព័រណ៍ម្ហូបអាហារ នំចំណី ផ្លែឈើ និងភេសជ្ជៈបែបខ្មែរ មានការប្រគំតន្ត្រីខា្នតតូច សំឡេងស្រាល ការសម្តែងផ្ទាំងទស្សនីយភាពសិល្បៈផ្សេងៗជាច្រើនទម្រង់ អមដោយការអត្ថាធិប្បាយពីពិធីករ-ពិធីការិនីល្បីៗ ដើម្បីជាកិច្ចស្វាគមន៍ និងផ្តល់ភាពសប្បាយរីករាយជូនភ្ញៀវទេសចរទាំងជាតិ និងអន្តរជាតិផងដែរ៕

ព័ត៌មានទាក់ទង