អ្នកតវ៉ាបានប្រមូលផ្តុំគ្នា ក្នុងទីក្រុងវ៉ាស៉ីនតោន និងនៅតាមទីក្រុងតូចៗដូចជា Asheville រដ្ឋ North Carolina ដោយអ្នកតវ៉ាបានដើរកាត់ទីប្រជុំជន ហើយស្រែកថា «No ICE, no KKK, no fascist USA» ដែលជាពាក្យស្លោកប្រើសម្រាប់ប្រឆាំងនឹងចំណាត់ការបង្រ្កាបជនអន្តោវប្រវេសន៍របស់ លោក ត្រាំ។ នេះបើតាមវីដេអូចែកចាយតាមបណ្តាញសង្គម។ អ្នកធ្វើការ និងនិស្សិតអាមេរិករាប់ពាន់នាក់ បានដើរដង្ហែតាមទីក្រុង និងបរិវេណសាកលវិទ្យាល័យ នាថ្ងៃអង្គារ ទី២០ ខែមករា ដើម្បីសម្តែងការប្រឆាំងចំពោះគោលនយោបាយអន្តោប្រវេសន៍ របស់លោកប្រធានាធិបតី ដូណាល់ ត្រាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ និស្សិតសាកលវិទ្យាល័យ បានធ្វើបាតុកម្មនៅទីក្រុង Cleveland រដ្ឋ Ohio ដោយស្រែកថា «មិនត្រូវស្អប់ កុំភ័យ ជនភៀសខ្លួនត្រូវបានស្វាគមន៍នៅទីនេះ» ខណៈដែលសិស្សវិទ្យាល័យនៅទីក្រុង Santa Fe រដ្ឋ New Mexico នាំគ្នាផ្អាករៀនដើម្បីទៅចូលរួមការជួបជុំតវ៉ា នៅរដ្ឋធានីវ៉ាស៉ីនតោនឌីស៉ី។ សកម្មភាពទាំងអស់នេះ រៀបចំឡើងដោយក្រុមមាននិន្នាការឆ្វេងនិយម ដូចជា Indivisible និង 50501 ក៏ដូចជាសហជីពការងារ និងអង្គការមូលដ្ឋានជំទាស់នឹងការឃុំឃាំងជនអន្តោប្រវេសន៍។ គួរបញ្ជាក់ថា ២០ មករា ២០២៦ គឺជាថ្ងៃគម្រប់មួយឆ្នាំនៃការចូលកាន់តំណែងអាណត្តិទីពីររបស់លោក ត្រាំ។ ការតវ៉ាបានផ្ទុះឡើងទូទាំងប្រទេស បន្ទាប់ពីមន្រ្តីសហព័ន្ធ បានអូសពលរដ្ឋអាមេរិកម្នាក់ចេញពីរថយន្ត ហើយបានបាញ់សម្លាប់ស្រ្តីម្នាក់ទៀត អាយុ៣៧ឆ្នាំ នៅទីក្រុង Minneapolis រដ្ឋ Minnesota អំឡុងពេលប៉ុន្មានសប្តាហ៍មកនេះ៕

ព័ត៌មានទាក់ទង