សមាជិកព្រឹទ្ធសភា Ron Wyden, Ed Markey និង Ben Ray Luján បានលើកឡើងថា ក្រុមហ៊ុនក្រោមការដឹកនាំរបស់លោក Elon Musk បានបណ្តោយឱ្យអ្នកប្រើប្រាស់បង្កើត និងចែករំលែករូបភាពអាសអាភាសដែលមិនមានការយល់ព្រម (Deepfake) និងរូបភាពរំលោភបំពានផ្លូវភេទលើកុមារ ដែលទង្វើនេះគឺជាសកម្មភាពខុសច្បាប់យ៉ាងធ្ងន់ធ្ងរ។ ភាពតានតឹងជុំវិញការគ្រប់គ្រងខ្លឹមសារលើបណ្តាញសង្គមបានឈានដល់កម្រិតថ្មីមួយ បន្ទាប់ពីសមាជិកព្រឹទ្ធសភាអាមេរិកមកពីគណបក្សប្រជាធិបតេយ្យចំនួន ៣ រូប បានផ្ញើលិខិតចំហមួយទៅកាន់ក្រុមហ៊ុន Apple និង Google កាលពីថ្ងៃសុក្រ ដើម្បីស្នើឱ្យផ្អាកកម្មវិធី X (អតីត Twitter) និងកម្មវិធី AI Grok ចេញពី Store កម្មវិធីរបស់ពួកគេ។ នៅក្នុងលិខិតផ្ញើទៅកាន់លោក Tim Cook ដែលជា CEO របស់ Apple និងលោក Sundar Pichai ជា CEO របស់ Google ក្រុមសមាជិកព្រឹទ្ធសភាបានសង្កត់ធ្ងន់ថា៖ «ការធ្វើមិនដឹងមិនឮចំពោះទង្វើដ៏អាក្រក់របស់ X នឹងធ្វើឱ្យការអនុវត្តការគ្រប់គ្រងខ្លឹមសាររបស់អ្នកក្លាយជារឿងកំប្លែង»។ កម្មវិធី Grok ដែលជាបញ្ញាសិប្បនិម្មិតរបស់ក្រុមហ៊ុន xAI ត្រូវបានគេរកឃើញថា អនុញ្ញាតឱ្យអ្នកប្រើប្រាស់បង្កើតរូបភាពអាសអាភាសក្លែងក្លាយរបស់បុគ្គលដទៃដោយងាយស្រួល និងត្រូវបានប្រើដើម្បីបង្កាច់បង្ខូច ឬរើសអើងមនុស្សផ្អែកលើពូជសាសន៍ និងជាតិសាសន៍។ ក្នុងករណីជាក់ស្តែងមួយ ជនរងគ្រោះដែលជាកូនចៅរបស់អ្នករស់រានមានជីវិតពីការសម្លាប់រង្គាល Holocaust ត្រូវបានគេប្រើប្រាស់ AI ដើម្បី ដោះសម្លៀកបំពាក់ ក្នុងរូបភាពអាសអាភាសដែលជារឿងអសីលធម៌បំផុត។ ទោះបីជាមានការរិះគន់ខ្លាំងក្លា ប៉ុន្តែក្រុមហ៊ុន xAI របស់លោក Musk ទើបតែប្រកាសកាលពីសប្តាហ៍នេះថា ខ្លួនទទួលបានមូលនិធិបន្ថែមចំនួន ២០ ប៊ីលីនដុល្លារ ពីវិនិយោគិនធំៗ រួមមាន Nvidia និង Cisco ជាដើម។ កាលពីថ្ងៃទី៣ ខែមករា លោក Musk បានអះអាងថា អ្នកដែលប្រើប្រាស់ Grok ដើម្បីបង្កើតខ្លឹមសារខុសច្បាប់នឹងត្រូវទទួលខុសត្រូវចំពោះមុខច្បាប់ ប៉ុន្តែក្រុមការងារផ្នែកសុវត្ថិភាពចំនួន ៣ រូបរបស់ xAI បានសម្រេចចិត្តលាឈប់ពីការងារ ដោយសារលោក Musk បានបញ្ជាឱ្យដកចេញនូវវិធានការការពារសុវត្ថិភាពមួយចំនួន៕

ព័ត៌មានទាក់ទង