នៅលើយន្តហោះ Air Force One ពេលចាកចេញពីកូរ៉េខាងត្បូង លោក ត្រាំ បានប្រាប់អ្នកយកព័ត៌មាន យ៉ាងដូច្នេះថា «ខ្ញុំនឹងទៅប្រទេសចិន នៅខែមេសា ហើយគាត់នឹងមកទីនេះ (អាមេរិក) នៅពេលណាមួយបន្ទាប់ពីនោះ អាចនៅរដ្ឋ Florida, Palm Beach ឬ Washington DC»។ ប្រធានាធិបតីអាមេរិក លោក ដូណាល់ ត្រាំ បាននិយាយបន្ទាប់ពីជួបប្រធានាធិបតី ស៉ី ជីនពីង ថាលោកមានគម្រោងទៅទស្សនកិច្ចនៅប្រទេសចិន ក្នុងខែមេសា ឆ្នាំ២០២៦។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី៣០ ខែតុលា ឆ្នាំ ២០២៥។ គួរបញ្ជាក់ថា លោក ត្រាំ ធ្លាប់ទៅជួបលោក ស៉ី នៅទីក្រុងប៉េកាំង កាលខែវិច្ឆិកា ឆ្នាំ ២០១៧ ជាទស្សនកិច្ចផ្លូវរដ្ឋនៅប្រទេសចិន អំឡុងអណត្តិទី១។ នៅឆ្នាំ ២០១៩ មេដឹកនាំទាំងពីរ ខាងក្រៅកិច្ចប្រជុំកំពូល G20 ក្នុងប្រទេសជប៉ុន។ នៅថ្ងៃព្រហស្បតិ៍នេះ លោក ត្រាំ និងលោក ស៉ី បានជួបគ្នាជាថ្មីក្នុងប្រទេសកូរ៉េខាងត្បូង ដោយសម្រេចបាននូវការបញ្ចុះពន្ធគយអាមេរិកសម្រាប់ចិន ហើយជាថ្នូរ ទីក្រុងប៉េកាំង យល់ព្រមបន្តទិញសណ្តែកសៀងអាមេរិក និងផលិតផលកសិកម្មដទៃទៀតឡើងវិញក្នុងបរិមាណច្រើន ព្រមទាំងលុបចោលការរឹតត្បិតលើការនាំចេញរ៉ែកម្រដ៏សំខាន់៕

ព័ត៌មានទាក់ទង