រាជធានីភ្នំពេញ៖លោកបន្ថែមថា រោងចក្រទាំងនេះបានផ្តល់ការងារ សរុបមានចំនួន ១,២៣៤,០២៨នាក់ ក្នុងនោះមានស្រីចំនួន ៨៩០,២០៨នាក់ ស្មើនឹង ៧២.១៤%។លោក ផែ ច័ន្ទត្រាវុឌ្ឍ អគ្គនាយកឧស្សាហកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានឱ្យដឹងថា គិតត្រឹមខែសីហា ឆ្នាំ២០២៥នេះ រោងចក្រធុនធំ ដែលបាន​ចុះបញ្ជីនៅអគ្គនាយកដ្ឋានឧស្សាហកម្ម ​និងកំពុងបើកដំណើរការនៅកម្ពុជា​មានចំនួន ២,៧៨៤ រោងចក្រ មានទុនវិនិយោគសរុបមានចំនួនជាង ២២​ពាន់លានដុល្លារអាមេរិក​ ​ក្នុងនោះរោងចក្រធុនធំកើតថ្មីមានជាង ៣០០រោងចក្រ។ លោកបានគូសបញ្ជាក់ថា «ទុនវិនិយោគសរុបមានចំនួនជាង ២២,៥០៥លានដុល្លារអាមេរិក មានការកើនឡើងចំនួនជាង២,៨៨០លានដុល្លារអាមេរិក ស្មើនឹង ១៤.៦៨% បើធៀបទៅនឹងរយៈពេលដូចគ្នាកាលពីឆ្នាំមុន ក្នុងនោះទុនវិនិយោគក្នុងស្រុក ចំនួនជាង ៣,៨៩៣លានដុល្លារអាមេរិក ស្មើនឹង ១៧.៣% នៃទុនវិនិយោគសរុប»។ លោក ផែ ច័ន្ទត្រាវុឌ្ឍ គូសបញ្ជាក់បែបនេះធ្វើឡើងក្នុង សិក្ខាសាលាផ្សព្វផ្សាយសេចក្ដីណែនាំ ស្តីពីការធ្វើប្រតិភូកម្ម សិទ្ធអំណាច ទៅឱ្យមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រាជធានី-ខេត្ត បទបង្ហាញ ស្ដីពីគោលការណ៍ណែនាំប្លង់បច្ចេកទេសឧស្សាហកម្ម និងសុវត្ថិភាពឧស្សាហកម្មនិងបទបង្ហាញ ស្ដីពីការរៀបចំទិន្នន័យរោងចក្រតាមប្រព័ន្ធព័ត៌មានភូមិសាស្ត្រ-GIS ដែលបានរៀបចំឡើងនាថ្ងៃទី១១ ខែកញ្ញា ឆ្នាំ២០២៥នេះ ក្រោមវត្តមាន លោកបណ្ឌិត ទឹង ស៊ីនី រដ្ឋលេខាធិការ និងជាតំណាងដ៏ខ្ពង់ខ្ពស់លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍។ ​ លោក ផែ ច័ន្ទត្រាវុឌ្ឍ បានមានប្រសាសន៍ថា សមិទ្ធិផលទាំងនេះគឺឆ្លុះបញ្ចាំងអំពីការខិតខំប្រឹងប្រែង របស់រារដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ដែលបានពុះពារគ្រប់ឧបសគ្គប្រើនូវបញ្ញាញាណឈ្លាសវៃ ដើម្បីកៀគរប្រភពវិនិយោគពីបរទេសចូលមកកម្ពុជាបានយ៉ាងច្រើនជាអនេកកប្បការ។ ​ លោកបានកត់សម្គាល់បន្ថែមថា នៅក្នុងដំណាក់កាលចុងក្រោយនេះ ​ពិពិធកម្មសេដ្ឋកិច្ចកាន់តែមានវឌ្ឍនភាពល្អប្រសើរ ក្នុងនោះមានដៃគូពាណិជ្ជកម្មកាន់តែច្រើនជាងមុន ហើយក៏មានការកើនឡើង នៃការវិនិយោគក្នុងវិស័យដែលមានសក្តានុពល និងមានតម្លៃបន្ថែមខ្ពស់ក្រៅពីវិស័យកាត់ដេរ ដូចជាការផលិតកម្មគ្រឿងបង្គុំអេឡិចត្រូនិក និងរថយន្តជាដើម ដែលក្លាយទៅជាវិស័យរួមចំណែកច្រើនដល់កំណើនសេដ្ឋកិច្ចជាតិ។ នៅក្នុងដំណើរអភិវឌ្ឍន៍ក្នុងរយៈពេលមធ្យម និងរយៈពេលវែងទៅមុខ កម្ពុជាត្រូវតែពង្រឹង និងពន្លឿនការអភិវឌ្ឍន៍វិស័យឧស្សាហកម្មរបស់ខ្លួន និងត្រូវធ្វើបរិវត្តកម្ម និងពិពិធកម្មរចនាសម្ព័ន្ធ និងមូលដ្ឋានសេដ្ឋកិច្ច ដែលបានទ្រទ្រង់កំណើនជាងពីរទស្សវត្សកន្លងមកនេះ ឱ្យស្របតាមការវិវត្តស្ថានភាពសង្គម សេដ្ឋកិច្ចបច្ចុប្បន្ន និងអាចបន្តទ្រទ្រង់កំណើនខ្ពស់ក្នុងរយៈយូរ និងកាន់តែមានភាពធន់ និងរឹងមាំ។ ​ លោកបន្តថា ដើម្បីចូលរួមអនុវត្តឱ្យសម្រេចនូវសមិទ្ធផលដែលជាគោលដៅរបស់រាជរដ្ឋាភិបាល ជាពិសេសក្នុងការធ្វើកំណែទម្រង់អភិបាលកិច្ចវិស័យឧស្សាហកម្ម ទើបអគ្គនាយកដ្ឋានឧស្សាហកម្មបានរៀបចំសិក្ខាសាលាផ្សព្វផ្សាយ ស្តីពីការធ្វើប្រតិភូកម្ម សិទ្ធអំណាច ទៅឱ្យមន្ទីរឧស្សាហកម្ម វិទ្យសាស្ត្រ បច្ចេកវិទ្យា និងនវានុវត្តន៍ រាជធានី-ខេត្ត, ​ការធ្វើបទបង្ហាញ ស្ដីពីគោលការណ៍ណែនាំប្លង់បច្ចេកទេសឧស្សាហកម្ម និងសុវត្ថិភាពឧស្សាហកម្ម និងបទបង្ហាញ ស្ដីពីការរៀបចំទិន្នន័យរោងចក្រតាមប្រព័ន្ធព័ត៌មានភូមិសាស្ត្រ-GIS នេះឡើង ក្នុងគោលបំណងឱ្យវិស័យឯកជន និងរដ្ឋកាន់តែជិតស្និត រាល់បែបបទរដ្ឋបាល និងសេវាសាធារណៈត្រូវបានកាត់បន្ថយ កាត់បន្ថយពេលវេលា និងចំណាយផ្សេងៗ ផងដែរ៕

ព័ត៌មានទាក់ទង