ម្មវិធីនេះ រៀបចំឡើងដោយ នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ សហការរាជធានីភ្នំពេញ៖ ជាមួយគណៈកម្មការរៀបចំមហោស្រពភាពយន្តកម្ពុជាអាស៊ី ដែលដឹកនាំដោយលោកស្រី Holly Hong ដើម្បីស្វែងរកខ្សែភាពយន្តដ៏ល្អឯក ដែលនឹងទទួលពានរង្វាន់ភាពយន្តឆ្នើម (Best Film) ប្រចាំឆ្នាំ។កម្មវិធីមហោស្រពភាពយន្តកម្ពុជាអាស៊ី លើកទី៣ ប្រចាំឆ្នាំ២០២៥ នឹងត្រូវរៀបចំឡើងរយៈពេល៥ថ្ងៃ នៅកម្ពុជា ចាប់ពីថ្ងៃទី៤ ដល់ថ្ងៃទី៨ ខែកញ្ញា ឆ្នាំ២០២៥។ លោក Tang Ke អនុប្រធាន​ប៉ុស្តិ៍​ភាពយន្ត​ចិន បានសម្តែងភាពរីករាយ​ ដែល​ភាពយន្តចិន ត្រូវបានចាក់បញ្ចាំងនៅ​មហោស្រព​ភាពយន្ត​អាស៊ី​កម្ពុជា​លើក​ទី​៣។ ក្នុងនាមប៉ុស្តិ៍ភាពយន្តចិន លោកបានថ្លែងអំណរគុណយ៉ាងជ្រាលជ្រៅចំពោះគណៈកម្មការរៀបចំកម្មវិធីនេះ។ លោក បានបន្តថា ឥឡូវនេះវាជាវេទិកាប្រព័ន្ធផ្សព្វផ្សាយពេញលេញ សម្រាប់ខ្សែភាពយន្តចិន រួមបញ្ចូលគ្នានូវទូរទស្សន៍ ទស្សនាវដ្តី ប្រព័ន្ធផ្សព្វផ្សាយអនឡាញ និងប្រព័ន្ធផ្សព្វផ្សាយថ្មី ដែលជាវេទិកាដ៏ធំ និងមានឥទ្ធិពលបំផុតរបស់ប្រទេសចិន សម្រាប់ការផ្សព្វផ្សាយវប្បធម៌ភាពយន្ត។ យើងមិនត្រឹមតែបង្ហាញភាពយន្តចិន និងបរទេសនោះទេ ប៉ុន្តែថែមទាំងជួយភាពយន្តចិនទៅកាន់ប្រទេសផ្សេងៗ និងជំរុញការផ្លាស់ប្តូរវប្បធម៌អន្តរជាតិតាមរយៈខ្សែភាពយន្តផងដែរ។ មហោស្រពបានទទួលស្នាដៃភាពយន្តចូលរួមចំនួន១៥០រឿង ក្នុងនោះមានភាពយន្តខ្នាតវែងចំនួន៦០រឿង និងភាពយន្តខ្នាតខ្លីចំនួន៩០រឿង។ ក្នុងចំណោមភាពយន្តខាងលើនេះ កម្ពុជាមានស្នាដៃភាពយន្តខ្នាតវែងចំនួន០២រឿង និងភាពយន្តខ្នាតខ្លីចំនួន ១៧រឿង ចូលរួមប្រកួតប្រជែង។ គណៈកម្មការ បានជ្រើសរើសភាពយន្តខ្នាតវែង ចំនួន១០រឿង និងភាពយន្តខ្នាតខ្លីចំនួន ៥រឿង ដើម្បីចាក់បញ្ចាំងជូនទស្សនាដោយសេរី នៅរោងភាពយន្ត Fable Cinema ចាប់ពីថ្ងៃទី៤ ដល់ថ្ងៃទី៨ ខែកញ្ញា ឆ្នាំ២០២៥។ ក្នុងចំណោមភាពយន្តទាំងនោះ មានភាពយន្តខ្មែរខ្នាតវែងគឺរឿង «ភ្លើងឆេះក្លឹបក្រោមដី» (ផលិតកម្មអិលឌី ភីកឈរ) និងភាពយន្តឯកសារខ្នាតខ្លីមានចំណងជើង «និយាយឡើងវិញ» ក៏បានជ្រើសរើសក្នុងការចាក់បញ្ចាំងផងដែរ។ វេទិកាឧស្សាហកម្មភាពយន្ត (Film Forum) ក្រោមប្រធានបទ «ភាពយន្តអាស៊ីកំពុងឈានទៅកាន់កម្រិតថ្មីមួយគួរឱ្យកត់សម្គាល់» ដែលនឹងរៀបចំនៅថ្ងៃទី៦ ខែកញ្ញា ឆ្នាំ២០២៥ វេលាម៉ោង៩ ដល់ម៉ោង១២ ថ្ងៃត្រង់ នៅរោងភាពយន្ត Fable Cinema ដោយមានវាគ្មិនកម្ពុជា និងបរទេស ៥រូប នឹងពិភាក្សាលើប្រធានបទនេះ ដោយមានការចូលរួមពីផលិតករ អ្នកដឹកនាំរឿង អ្នកនិពន្ធ និងសិស្សនិស្សិតចំនួន ៨០នាក់។ សម្រាប់កម្មវិធីចែកពានរង្វាន់ នឹងរៀបចំនៅថ្ងៃទី៦ ខែកញ្ញា ឆ្នាំ២០២៥ នៅកោះពេជ្រ (Koh Pich City Hall)។ កម្មវិធីនេះ នឹងធ្វើការប្រគល់ពានរង្វាន់សរុបចំនួន២១ពាន ជូនផលិតករ សិល្បករ សិល្បការិនី អ្នកជំនាញក្នុងវិស័យភាពយន្ត ដែលក្នុងនោះមានពានរង្វាន់សំខាន់ (Main Award) ចំនួន១៣, ពានរង្វាន់កិត្តិយស(Honor Award) ចំនួន៦ និងពានរង្វាន់លើកទឹកចិត្ត (Rise-Up Award) ចំនួន២។ កម្មវិធីនឹងគោរពស្នើសុំលោស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នឹងប្រគល់ពានរង្វាន់ ភាពយន្តឆ្នើម (Best Film) ជូនម្ចាស់ជ័យលាភី។ ពិធីនេះ នឹងមានការអញ្ជើញចូលរួមពីតំណាងក្រសួងការបរទេស និងសហប្រតិបត្តិការអន្តរជាតិ, ក្រសួងទេសចរណ៍, ក្រសួងព័ត៌មាន, ក្រសួងបរិស្ថាន, ក្រសួងអប់រំ យុវជន និងកីឡា សាលារាជធានីភ្នំពេញ ព្រមទាំងស្ថានទូតចិនប្រចាំកម្ពុជា, ផលិតករភាពយន្ត អ្នកដឹកនាំរឿង និងអ្នកជំនាញក្នុង ឧស្សាហកម្មភាពយន្តសរុបចំនួន៥០០នាក់។ ចំពោះសមាសភាពគណៈមេប្រយោគ (ប្រធាន១រូប និងសមាជិក៤រូប) រួមមាន៖ *កញ្ញា LIU Miaomiao, ចិន (អ្នកដឹកនាំនិងអ្នកសរសេររឿង) ជាប្រធាន *លោក YANG Chan, ចិន (អ្នកដឹកនាំ ផលិតករ) *លោក GEORGIEV Atanas, សាធារណរដ្ឋម៉ាសេដូនខាងជើង (ផលិតករ និងជាអ្នកកាត់ត) *លោក Sovichea CHEAP, កម្ពុជា (អនុប្រធាននាយកដ្ឋានភាពយន្ត) *លោក Jatla SIDDARTHA, ឥណ្ឌា (អ្នកដឹកនាំ អ្នកសរសេរ និងជាអ្នកថតភាពយន្ត) ដោយឡែកពានរង្វាន់ដែលត្រូវប្រគល់ពានរង្វាន់សរុបចំនួន២១ រួមមាន៖ ពានរង្វាន់សំខាន់ (Main Competition Award)ចំនួន១៣, ពានរង្វាន់កិត្តិយស (Asian Honor Section) ចំនួន៦ និងពានរង្វាន់សម្រាប់ភាពយន្តខ្នាតខ្លី (RISE-UP Section)ចំនួន២ ផងដែរ៕

ព័ត៌មានទាក់ទង