ថ្លែងប្រាប់ក្រុមអ្នកសារព័ត៌មាន ក្រុមបញ្ចប់ទស្សនកិច្ច, លោកស្រី ឆាយ ស៊ីវលីន បានគូសបញ្ជាក់ថា នេះគឺជាសមិទ្ធផលមួយដ៏អស្ចារ្យសម្រាប់កម្ពុជា ដែលទទួលបានអាកាសយានដ្ឋានអន្តរជាតិដ៏ល្អ ដោយសារមានបច្ចេកវិទ្យាទំនើបៗនៅក្នុងនេះ។ លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា បានបង្ហាញនូវការប្តេជ្ញាចិត្ដ ក្នុងការចូលរួមចំណែកជាមួយរដ្ឋាភិបាលកម្ពុជា ក្នុងការផ្សព្វផ្សាយ អាកាសយានដ្ឋានអន្តរជាតិតេជោ ដើម្បីទាក់ទាញភ្ញៀវទេសចរអន្តរជាតិ កាន់តែកើនឡើងចូលមកប្រទេសកម្ពុជា។ ការបង្ហាញនូវការប្ដេជ្ញាចិត្ដបែបនេះ ធ្វើឡើងក្នុងឱកាសដែល លោកស្រី ឆាយ ស៊ីវលីន និងសមាជិកនៃសមាគមទេសចរណ៍កម្ពុជា ប្រមាណជាង២០០នាក់ ចុះពិនិត្យពីវឌ្ឍនភាព អាកាសយានដ្ឋានអន្តរជាតិតេជោ ក្រុងតាខ្មៅ ខេត្តកណ្តាល នារសៀលថ្ងៃទី១០ ខែកុម្ភៈ ឆ្នាំ២០២៥។ លោកស្រី ឆាយ ស៊ីវលីន បានបញ្ជាក់ថា តាមរយៈទស្សនកិច្ចសិក្សានេះ សមាគមទេសចរណ៍កម្ពុជា នឹងយកទៅផ្សព្វផ្សាយ នៅតាមបណ្តាពិព័រណ៌ទេសចរណ៍ធំៗ នៅលើពិភពលោក ជាពិសេសនៅខែមីនាខាងមុខនេះ ដែលនឹងមានបេសកកម្មនៅទីក្រុងប៊ែរឡាំង ប្រទេសអាឡឺម៉ង់។ លោកស្រី ឆាយ ស៊ីវលីន បានលើកឡើងថា ខាងសមាគមលោកស្រី នឹងផ្តិតយករូបភាពទាំងនេះ ទៅបង្អួតការីទេសចរណ៍ ប្រតិបត្តិទេសចរណ៍នៅលើពិភពលោក ដែលប្រមូលផ្តុំគ្នា នៅក្នុងពិព័រណ៌ទេសចរណ៍​ ក្នុងប្រទេសអាឡឺម៉ង់។ លោកឧញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានឲ្យដឹងថា ប្រមុខរាជរដ្ឋាភិបាល បានឯកភាពសម្រេចឱ្យសម្ពោធ ដាក់ឱ្យប្រើប្រាស់ជាផ្លូវការ នូវកាសយានដ្ឋានអន្តរជាតិតេជោ ក្នុងខែកក្កដា ឆ្នាំ២០២៥នេះ។ ដូចនេះ នៅខែកក្កដា នឹងត្រៀមខ្លួនដើម្បីទៅដល់ការដាក់ឱ្យដំណើរការជាផ្លូវការតែម្តង។ ជាមួយគ្នានេះ លោកឧញ៉ា ឆារស៍ វ៉ាន់ ក៏បានស្នើឱ្យសមាជិកសមាគមទេសចរណ៍កម្ពុជាទាំងអស់ យកចិត្តទុកដាក់ដើម្បីទទួលភ្ញៀវ និងជួយធ្វើការផ្សព្វផ្សាយ ពីអាកាសយានដ្ឋានដ៏ធំមួយនេះផងដែរ។ លោកឧញ៉ា ឆារស៍ វ៉ាន់ បានបន្ថែមទៀតថា ប្រតិបត្តិករទេសចរណ៍ គឺជាផ្នែកមួយយ៉ាងសំខាន់ ក្នុងការកៀរគរ និងលើកទឹកចិត្តភ្ញៀវទេសចរ ដែលមកទស្សនាកម្ពុជា ប៉ុន្តែការមកទស្សនានេះដែរ លុះតែកម្ពុជាមានសម្ភារៈ ទីតាំងគ្រប់គ្រាន់សម្រាប់ពួកគេផងដែរ។ សូមជម្រាបថា ព្រលានយន្តហោះអន្តរជាតិតេជោ គ្រោងនឹងបញ្ចប់ការសាងសង់ និងផ្ទេរនូវប្រតិបត្តិការពីព្រលានយន្តចាស់ ទៅព្រលានយន្តហោះថ្មី នៅក្នុងខែឧសភា ឆ្នាំ២០២៥ ហើយបើគ្មានអ្វីប្រែប្រួលទេនោះ អាកាសយានដ្ឋានអន្តរជាតិតេជោ គ្រោងនឹងដាក់សម្ពោធជាផ្លូវការ នៅក្នុងអំឡុងខែកក្កដា ឆ្នាំ២០២៥។ ការសាងសង់នេះ បុគ្គលិក កម្មករ វិស្វករ និងអ្នកគ្រប់គ្រង ដែលកំពុងបម្រើការងារ នៅឯការដ្ឋានសាងសង់ មានចំនួនសរុបប្រមាណជិត ១៦,០០០នាក់ ក្នុងនោះមានខ្មែរជាង ៩០%។ នេះបើតាមការបញ្ជាក់របស់លោក ស៊ីន ចាន់សិរីវុត្ថា រដ្ឋលេខាធិការ និងអ្នកនាំពាក្យអាកាសចរណ៍ស៊ីវិល ប្រាប់មកបណ្តាញព័ត៌មាន Fresh News។ នាពេលថ្មីៗនេះ ទូរទស្សន៍ដ៏ល្បីរបស់សហរដ្ឋអាមេរិក CNN បានចុះផ្សាយថា អាកាសយានដ្ឋាន​អន្តរជាតិតេជោ (Techo International Airport) នឹងក្លាយជាស្ថាបត្យកម្មដ៏មានឥទ្ធិពល លើពិភពលោក ឆ្នាំ២០២៥ ក្នុងចំណោមស្ថាបត្យកម្មចំនួន១១។ អាកាសយានដ្ឋាន​អន្តរជាតិតេជោ សាងសង់លើផ្ទៃដីសរុប ២,៦០០ហិកតា ស្ថិតនៅចម្ងាយ ១៩គីឡូម៉ែត្រ ពីរាជធានីភ្នំពេញ។ វាត្រូវបានចាត់ថ្នាក់ ជាអាកាសយានដ្ឋាន 4F ហើយត្រូវបានអភិវឌ្ឍជា ៣ដំណាក់កាល។ ថវិកាវិនិយោគសម្រាប់ដំណាក់កាលទី១ គឺ ១៥០០លានដុល្លារ ដោយមិនរាប់បញ្ចូលដីព្រលានយន្តហោះ។ អាកាសយានដ្ឋានអន្តរជាតិតេជោ ជាប្រភេទ 4F គឺប្រភេទព្រលាន​យន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន៕

ព័ត៌មានទាក់ទង