យោងតាមរបាយការណ៍បានបង្ហាញថា សម្រាប់រយៈពេល ៣ខែដែលបញ្ចប់ក្នុងខែមិថុនា ប្រាក់ចំណូលរបស់ក្រុមហ៊ុនចិន Lenovo បានកើនឡើងដល់ ១៥.៤ពាន់លានដុល្លារ លើសពីការប៉ាន់ស្មានជាមធ្យម ១៤.១ពាន់លានដុល្លារដែលរំពឹងទុកដោយអ្នកវិភាគដែលស្ទង់មតិដោយ LSEG។ ការកើនឡើងនេះ ត្រូវបានជំរុញជាចម្បងដោយកំណើននៅទូទាំងផ្នែកកុំព្យូទ័រ ហេដ្ឋារចនាសម្ព័ន្ធ និងសេវាកម្មរបស់ខ្លូន។ ប្រភពពី IDC បានរាយការណ៍ថា ការនាំចេញកុំព្យូទ័រទូទាំងពិភពលោកបានកើនឡើង ៣ភាគរយ ដល់ ៦៤.៩លានគ្រឿង ខណៈដែលតួរលេខនេះ បានធ្វើឱ្យក្រុមហ៊ុន Lenovo បន្តរក្សាជំហរជាក្រុមហ៊ុនផលិតកុំព្យូទ័រកំពូល ដោយកាន់កាប់ចំណែកទីផ្សារប្រមាណ ២៣ភាគរយ។ ក្រុមហ៊ុន Lenovo Group ដែលជាក្រុមហ៊ុនផលិតកុំព្យូទ័រដ៏ធំបំផុតមួយនៅលើពិភពលោក បានរាយការណ៍ពីការកើនឡើងប្រមាណ ២០ភាគរយនៅក្នុងប្រាក់ចំណូលប្រចាំត្រីមាសរបស់ខ្លួនដែលបញ្ចប់នៅខែមិថុនា ដោយបានយកឈ្នះលើការប៉ាន់ស្មានរបស់អ្នកវិភាគ ខណៈដែលទីផ្សារកុំព្យូទ័រយួរដៃ (personal computer) ជាសកលបានបង្ហាញពីសញ្ញានៃការងើបឡើងវិញ បន្ទាប់ពីការធ្លាក់ចុះរយៈពេល ២ឆ្នាំជាប់គ្នា។​ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៥ ខែសីហា ឆ្នាំ២០២៤។ គួរជម្រាបដែរថា ភាពជោគជ័យនេះក៏បានចូលរួមចំណែកយ៉ាងសកម្មពីផ្នែកផ្សេងទៀតរួមមាន ក្រុមដំណោះស្រាយហេដ្ឋារចនាសម្ព័ន្ធ (ISG) ដែលរាប់បញ្ចូលម៉ាស៊ីនមេ និង hardware បានកើនឡើង ៦៥ភាគរយ ឈានដល់ ៣ពាន់លានដុល្លារ និងក្រុមដំណោះស្រាយ & សេវាកម្ម (SSG) បានកើនឡើង១០ភាគរយ ឈានដល់ប្រាក់ចំណូល ១.៩ពាន់លានដុល្លារផងដែរ៕

ព័ត៌មានទាក់ទង