ក្រសួងការពារជាតិចិន បានប្រកាសឱ្យដឹងថា សមយុទ្ធយោធា Joint Sea-2025 បានចាប់ផ្តើមប្រព្រឹត្តទៅនៅលើដែនទឹក ក្បែរទីក្រុងកំពង់ផែ Vladivostok នៃប្រទេសរុស្ស៉ី ហើយនឹងមានរយៈពេលសរុប៣ថ្ងៃ។ អំឡុងសមយុទ្ធ ភាគីទាំងពីរ នឹងរួមគ្នាហ្វឹកហាត់លើប្រតិបត្តិការជួយសង្រ្គោះករណីលិចនាវាមុជទឹក ប្រតិបត្តិការប្រឆាំងនាវាមុជទឹក ប្រតិបត្តិការការពារមីស៉ីលនិងដែនអាកាស ព្រមទាំងប្រតិបត្តិការប្រយុទ្ធនៅលើដែនទឹក។ ចិនបានបញ្ជូននាវាចម្បាំង៤គ្រឿង ចូលរួមសមយុទ្ធយោធានេះ។ នៅថ្ងៃអាទិត្យ ទី៣ ខែសីហា ចិននិងរុស្ស៉ីបានចាប់ផ្តើមការធ្វើសមយុទ្ធយោធាជើងទឹករួមគ្នា នៅតំបន់សមុទ្រជប៉ុន ស្របពេលដែលប្រទេសទាំងពីរពង្រឹងភាពជាដៃគូ ចំពោះមុខអ្វីដែលពួកគេមើលឃើញថា សណ្តាប់ធ្នាប់ពិភពលោកដឹកនាំដោយ​សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ គួរបញ្ជាក់ថា ចិននិងរុស្ស៉ីនឹងធ្វើសមយុទ្ធយោធាប្រចាំឆ្នាំរួមគ្នា អស់រយៈពេលប៉ុន្មានឆ្នាំមកហើយ ដោយសមយុទ្ធ Joint Sea បានចាប់ផ្តើមកាលពីឆ្នាំ២០១២។ សមយុទ្ធកាលពីឆ្នាំមុន ត្រូវបានធ្វើឡើងនៅក្បែរឆ្នេរភាគខាងត្បូងប្រទេសចិន។ ប៉ុន្មានឆ្នាំចុងក្រោយនេះ ក្រៅពីទំនាក់ទំនងសេដ្ឋកិច្ចនិងនយោបាយ ទីក្រុងមូស្គូនិងទីក្រុងប៉េកាំង បានពង្រឹងកិច្ចសហប្រតិបត្តិការយោធា កាន់តែរឹងមាំថែមទៀត៕

ព័ត៌មានទាក់ទង