លោក Wang បាននិយាយថា ចិនសង្ឃឹមថា ដាណឺម៉ាកនឹងបន្តគាំទ្រគោលជំហរត្រឹមត្រូវស្របច្បាប់របស់ចិន ជុំវិញបញ្ហានានា ដែលពាក់ព័ន្ធជាមួយអធិបតេយ្យនិងបូរណភាពទឹកដីរបស់ចិន។ ការលើកឡើងបែបនេះ គឺបន្ទាប់ពីនៅសប្តាហ៍មុន អតីតមេដឹកនាំតៃវ៉ាន់ លោកស្រី Tsai Ing-wen បានបំពេញទស្សនកិច្ចទៅកាន់ទីក្រុងកូប៉ិនហាក ដែលនាំឱ្យមានការរិះគន់ខ្លាំងៗ ពីទីក្រុងប៉េកាំង។ ដែនកោះតៃវ៉ាន់ ត្រូវទីក្រុងប៉េកាំងចាត់ទុកត្រឹមជា ផ្នែកមួយប៉ុណ្ណោះនៃប្រទេសចិន។ ថ្លែងប្រាប់រដ្ឋមន្រ្តីការបរទេសដាណឺម៉ាក លោក Lars Lokke Rasmussen នៅទីក្រុងប៉េកាំង នាថ្ងៃចន្ទ ទី១៩ ខែឧសភា រដ្ឋមន្រ្តីការបរទេសចិន លោក Wang Yi បាននិយាយថា ប្រទេសចិនសង្ឃឹមថា ដាណឺម៉ាកនឹងបន្តគោរពអធិបតេយ្យ និងបូរណភាពទឹកដីរបស់ចិន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ គួរបញ្ជាក់ថា ក្រៅពីនេះ លោករដ្ឋមន្រ្តីការបរទេសចិន បានប្រាប់សមភាគីដាណឺម៉ាកថា ចិនគោរពយ៉ាងពេញលេញចំពោះ​អធិបតេយ្យ ក៏ដូចជាបូរណភាពទឹកដីរបស់ប្រទេសដាណឺម៉ាក ជុំវិញបញ្ហាកោះ Greenland ដែលជាដែនដីស្វយ័តដ៏ធំមួយ ស្ថិតក្រោមការគ្រប់គ្រងរបស់ដាណឺម៉ាក និងដែលប្រធានាធិបតីអាមេរិក លោក ដូណាល់​ ត្រាំ បានលើកឡើងជាច្រើនលើកថា ចង់កាន់កាប់៕

ព័ត៌មានទាក់ទង