ក្រោយកិច្ចសន្ទនា នៅឯប្រទេសស្វីស ភាគីទាំងពីរនិយាយថាព័ត៌មានលម្អិតបន្ថែម នឹងត្រូវចេញផ្សាយនាថ្ងៃចន្ទនេះ។ រដ្ឋមន្រ្តីហិរញ្ញវត្ថុ លោក Scott Bessent និងអ្នកតំណាងពាណិជ្ជកម្មអាមេរិក លោក Jamieson Greer បាននិយាយថា មានការព្រមព្រៀងមួយជាមួយចិន ដើម្បីកាត់បន្ថយឱនភាពពាណិជ្ជកម្មរបស់សហរដ្ឋអាមេរិក។ បណ្តាវិនិយោគិន​ បានសាទរដល់កិច្ចប្រឹងប្រែងផ្សះផ្សា​ក្នុងសង្រ្គាមពាណិជ្ជកម្មរវាងសហរដ្ឋអាមេរិក និងចិន តាមរយៈការជួបសន្ទនាកម្រិតខ្ពស់នាចុងសប្តាហ៍កន្លងទៅ ដែលអាចនាំទៅរកការលុបបំបាត់ភាពមិនច្បាស់លាស់មួយចំនួននៃទីផ្សារហិរញ្ញវត្ថុ ទោះជាមិនទាន់អាចបំបែកបាននូវភាពជាប់គាំងធំដុំណាមួយក៏ដោយ។ នេះបេីយោងតាមការចេញផ្សាយដោយទីភ្នាក់សារព័ត៌មាន Reuters នៅថ្ងៃចន្ទ ទី១១ ខែឧសភា ឆ្នាំ ២០២៥។ លោក Eric Kuby ប្រធានផ្នែកវិនិយោគនៅក្រុមហ៊ុន North Star Investment Management Corp ក្នុងទីក្រុង Chicago កត់សម្គាល់ថា នេះជាជំហានមួយក្នុងទិសដៅត្រឹមត្រូវ ដែលបង្ហាញថាភាគីទាំងពីរចាប់អារម្មណ៍ឈានទៅរកការស្ថាបនា និងអភិវឌ្ឍទំនាក់ទំនងពាណិជ្ជកម្មឱ្យមានភាពប្រសើរឡើង។ ប្រធានផ្នែកយុទ្ធសាស្រ្តអត្រាការប្រាក់របស់សហរដ្ឋអាមេរិក នៅក្រុមហ៊ុនហិរញ្ញវត្ថុ TD Securities លោក Gennadiy Goldberg ក្នុងទីក្រុងញូវយ៉ក បាននិយាយថា ប្រសិនបើអាចសម្រេចបានកិច្ចព្រមព្រៀងពាណិជ្ជកម្ម នោះតម្លៃទំនិញឬសេវាកម្ម នឹងមានតម្លាភាពវិញ។ លោក Jack Ablin ដែលជាដៃគូស្ថាបនិក និងជាប្រធានផ្នែកវិនិយោគនៅក្រុមហ៊ុន Cresset Capital ក្នុងទីក្រុង Chicago បាននិយាយថា ខ្ញុំមិនប្រាកដទេថាអាចសម្រេចបានការលក់កម្រិតណា ប៉ុន្តែប្រសិនបើយើងអាចធ្វើឱ្យមានភាពរីកចម្រើនជាមួយចិន ខ្ញុំគិតថាទីផ្សារនឹងងេីបឡេីងវិញទៅតាមនោះ។ លោកស្រី Liqian Ren នាយិការក្រុមហ៊ុន Modern Alpha បាននិយាយថា ទាំងសហរដ្ឋអាមេរិក និងចិនប្រហែលជាសុទ្ធតែចង់ឈានឱ្យដល់កិច្ចព្រមព្រៀងមួយ។ ឥឡូវនេះ ទីផ្សារប្រហែលជាមានសុទិដ្ឋិនិយមបន្តិចទាក់ទងនឹងអ្វីដែលចិន និងសហរដ្ឋអាមេរិកអាចសម្រេចបាននៅថ្ងៃខាងមុខ។ គួរបញ្ជាក់ថា ចំពេលមានសញ្ញាធូរស្បើយខ្លះ ជុំវិញសង្រ្គាមពាណិជ្ជកម្មអាមេរិក-ចិន សន្ទស្សន៍ភាគហ៊ុននៅសហរដ្ឋអាមេរិកបានកើនឡើង កាលពីល្ងាចថ្ងៃអាទិត្យ។ សន្ទស្សន៍ភាគហ៊ុនរបស់ S&P 500 E-minis បានកើនឡើង ១.៣ភាគរយ ខណៈដែល Nasdaq កេីនឡេីងបន្ថែម ១.៦ភាគរយ៕

ព័ត៌មានទាក់ទង