ទូរទស្សន៍ Al-Masirah របស់ក្រុមហ៊ូទី បានរាយការណ៍ពីការវាយប្រហារតាមអាកាសចំនួន ៤៨លើកកាលពីថ្ងៃចន្ទ សំដៅលើទីក្រុងកំពង់ផែ Hodeidah, អាកាសយានដ្ឋាន, រោងចក្រស៊ីម៉ងត៍ និងទីតាំងយោធា។ អ្នកស្រុកបានប្រាប់ទីភ្នាក់ងារស៊ីនហួរ ថា ការវាយប្រហារបានបង្កការខូចខាតហេដ្ឋារចនាសម្ព័ន្ធយ៉ាងខ្លាំង។ សេចក្តីថ្លែងការណ៍របស់ក្រុមហ៊ូទីបានបញ្ជាក់ថា មនុស្ស ៣នាក់ស្លាប់ និង ៣៥នាក់របួសនៅរោងចក្រស៊ីម៉ងត៍ ហើយម្នាក់ទៀតស្លាប់ និង០៤នាក់របួសនៅកំពង់ផែ។ អាជ្ញាធរសុខាភិបាលដែលគ្រប់គ្រងដោយក្រុមហ៊ូទីនៅយេម៉ែន បានប្រកាសនៅថ្ងៃអង្គារនេះ ថា មនុស្សយ៉ាងតិច ៤នាក់បានស្លាប់ និង ៣៩នាក់ផ្សេងទៀតរងរបួស នៅក្នុងការវាយប្រហារតាមអាកាសរបស់អ៊ីស្រាអែលទៅលើខេត្ត Hodeidah កាលពីថ្ងៃចន្ទ។នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ នៅថ្ងៃអង្គារ ទី៦ ខែឧសភា ឆ្នាំ២០២៥។ យោធាអ៊ីស្រាអែលបានបញ្ជាក់ថា ការវាយប្រហារនេះធ្វើឡើងជាសងសឹងកនឹង «ការវាយប្រហារម្តងហើយម្តងទៀត» ដោយក្រុមហ៊ូទីប្រឆាំងនឹងអ៊ីស្រាអែល។ ការវាយប្រហារនេះ កើតឡើងបន្ទាប់ពីក្រុមហ៊ូទី បានបាញ់មីស៊ីលកាលពីថ្ងៃអាទិត្យ សំដៅទៅជិតអាកាសយានដ្ឋាន Ben Gurion របស់អ៊ីស្រាអែល ដែលបណ្តាលឲ្យមនុស្ស ៨នាក់រងរបួស។ គួរបញ្ជាក់ថា ក្រុមហ៊ូទីដែលគ្រប់គ្រងភាគខាងជើងយេម៉ែន បានបើកការវាយប្រហារជាច្រើនលើកលើអ៊ីស្រាអែលចាប់តាំងពីខែវិច្ឆិកា ឆ្នាំ២០២៣ ដោយអះអាងថាជាសាមគ្គីភាពជាមួយប៉ាឡេស្ទីន។ ក្រុមនេះបានបញ្ជាក់ថា ខ្លួននឹងបញ្ឈប់ការវាយប្រហារ ប្រសិនបើអ៊ីស្រាអែលបញ្ចប់យុទ្ធនាការយោធា និងការបិទផ្លូវនៅតំបន់ហ្គាហ្សា។ ការវាយប្រហារគ្នាទៅវិញទៅមករវាងអ៊ីស្រាអែល និងក្រុមហ៊ូទី ដែលជាសម្ព័ន្ធមិត្តរបស់អ៊ីរ៉ង់ កំពុងបង្កើនការព្រួយបារម្ភអំពីការពង្រីកជម្លោះក្នុងតំបន់មជ្ឈិមបូព៌ាឲ្យកាន់តែទូលំទូលាយ៕

ព័ត៌មានទាក់ទង