សមាជិកសភាគណបក្សសាធារណរដ្ឋអាមេរិកគឺជាអ្នករៀបចំដំណើរទស្សនកិច្ចនេះ។ ទោះជាយ៉ាងណាក៏ដោយ គណបក្សប្រជាធិបតេយ្យមួយចំនួនបានធ្វើពហិការមិនចូលរួមស្តាប់សុន្ទរកថានេះ ទេ ហើយក៏បានហៅលោក Netanyahu ថាជា ជនឧក្រិដ្ឋជនសង្គ្រាម សម្រាប់ការអនុញ្ញាតឱ្យកងកម្លាំងរបស់គាត់សម្លាប់ប្រជាជនប៉ាឡេស្ទីនជាង ៣៩,០០០ នាក់។ នាយក​រដ្ឋមន្ត្រី​អ៊ីស្រាអែលលោក Benjamin Netanyahu កំពុងស្ថិត​នៅ​អាមេរិក​ជា​លើក​ដំបូង​ចាប់​តាំង​ពី​ជម្លោះ​នៅ​ហ្គាហ្សា​ចាប់​ផ្តើម។ លោកបានថ្លែងសុន្ទរកថាក្នុងសម័យប្រជុំរួមគ្នានៃសភាកាលពីថ្ងៃពុធដោយជំរុញសមាជិកសភាកុំឱ្យបោះបង់ជំនួយយោធាដល់ប្រទេសរបស់លោក។ អនុប្រធានព្រឹទ្ធសភាអាមេរិក នឹងដឹកនាំសម័យប្រជុំរួមគ្នាខាងលើនេះ ទោះបីសមាជិកសភាគណបក្សប្រជាធិបតេយ្យមិនចូលរួមស្តាប់ក៏ដោយ។ ប៉ុន្តែ លោកស្រី Kamala Harris បានរំលងកិច្ចប្រជុំនេះ ដោយគ្រាន់តែបានលើកឡើងពីជម្លោះប៉ាទ្បេស្ទីន អ៊ីស្រាអែល តាមតែកាលវិភាគ ត្រឹមតែប៉ុន្មានថ្ងៃប៉ុណ្ណោះក្នុងយុទ្ធនាការរបស់លោកស្រីសម្រាប់ប្រធានាធិបតី។ លោក Netanyahu បានប្តេជ្ញាចិត្តថានឹងបន្តការប្រយុទ្ធគ្នានៅ Gaza រហូតដល់គាត់សម្រេចបាននូវគោលដៅរបស់គាត់។ គាត់ចង់នាំយកចំណាប់ខ្មាំងទាំងអស់មកវិញ កម្ចាត់ក្រុមហាម៉ាស និងធានាថាពួកសកម្មប្រយុទ្ធលែងបង្កការគំរាមកំហែងទៀតហើយ។ គាត់បានប្រាប់សមាជិកសភាថា សត្រូវរបស់យើងគឺជាសត្រូវរបស់អាមេរិកផងដែរ។ លោកថា ការប្រយុទ្ធរបស់យើងគឺជាការប្រយុទ្ធរបស់អ្នក ហើយជ័យជំនះរបស់យើងនឹងក្លាយជាជ័យជំនះរបស់អ្នក។ លោក Netanyahu បានថ្លែងថា រាល់ការស្លាប់របស់ជនស៊ីវិល គឺជាសោកនាដកម្ម សម្រាប់ប្រជាជនអ៊ីស្រាអែល។ ប៉ុន្តែសម្រាប់ក្រុម Hamas វាគឺជា យុទ្ធសាស្ត្ររបស់ពួកគេទៅវិញ ។ គាត់បាននិយាយថា គាត់មិនចង់តាំងទីលំនៅថ្មីនៅតំបន់ហ្គាហ្សាទេ ប៉ុន្តែបានសង្កត់ធ្ងន់ថា ទឹកដីត្រូវតែគ្មានយោធា បំបាត់រ៉ាឌីកាល់ និងដឹកនាំដោយប៉ាឡេស្ទីនដែលមិនចង់បំផ្លាញអ៊ីស្រាអែល។ លោកក៏បានស្នើឱ្យសមាជិកសភាអាមេរិកផ្តល់ ឧបករណ៍យោធាបន្ថែមទៀត ដើម្បីធ្វើឱ្យការងារប្រយុទ្ធនៅទីនោះកាន់តែសកម្ម និងលឿនជាងមុន។ យ៉ាងណាក៏ហ្វូងបាតុករ​រាប់​ពាន់​នាក់​បាន​ប្រមូល​ផ្តុំ​គ្នា​នៅ​ខាង​ក្រៅ​វិមាន​កាពីតូល ដោយ​អំពាវនាវ​ឲ្យ​ចាប់ខ្លួនលោក Netanyahu ភ្លាមៗ។ ប៉ុន្តែបាតុករខ្លះ​ត្រូវ​បាន​ចាប់​ខ្លួនបន្ទាប់​ពី​មាន​ជម្លោះ​ជាមួយ​ប៉ូលិស។ លោក Netanyahu នឹងជួបជាមួយប្រធានាធិបតី Joe Biden នៅថ្ងៃព្រហស្បតិ៍នៅឯសេតវិមាន។ នៅថ្ងៃសុក្រ លោកនឹងធ្វើដំណើរទៅកាន់រដ្ឋផ្លរីដា ដើម្បីជួបជាមួយអតីតប្រធានាធិបតី ដូណាល់ ត្រាំ ផងដែរ៕

ព័ត៌មានទាក់ទង