រាជធានីភ្នំពេញ:លោកស្រី ឡងឌី សាន់​ណា​រ៉ា រដ្ឋលេខាធិការ​និង​ជា​ប្រធាន​ក្រុមការងារ​ផ្សព្វផ្សាយ​អប់រំ បង្ការ ទប់ស្កាត់​ការប្រើប្រាស់​និង​ជួញដូរ​គ្រឿងញៀន ប្រចាំ​ក្រសួង​វប្បធម៌ និង​វិចិត្រសិល្ប​: នា​រសៀល​ម្សិលមិញ បាន​ដឹកនាំ​កិច្ចប្រជុំ​ក្រុមការងារ ដើម្បី​ត្រៀម​រៀបចំ​វគ្គ​បណ្តុះបណ្តាល​ជន​បង្គោល ក្រោម​ប្រធានបទ​«​ខ្ញុំ អ្នក យើងទាំងអស់គ្នា រួមគ្នា​ដើម្បី​ជីវិត និង​សហគមន៍​យើង​គ្មាន​គ្រឿងញៀន​» ដែល​នឹង​គ្រោង​ប្រារព្ធ​ធ្វើឡើង​នៅ​ថ្ងៃទី​១៦ ខែកក្កដា ឆ្នាំ​២០២៤ ខាងមុខ​។​ សូមបញ្ជាក់ថា ក្នុងពេល​កន្លងមក សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​យកចិត្តទុកដាក់ និង​ស្នើឱ្យ​ក្រសួង ស្ថាប័ន និង​អង្គភាព​រដ្ឋបាល ថ្នាក់ជាតិ និង​ថ្នាក់ក្រោម​ជាតិ បន្ត​យកចិត្តទុកដាក់ និង​ចូលរួមចំណែក​កាន់តែ​សកម្ម​ជុល​ផុស​ក្នុងការ​ប្រយុទ្ធប្រឆាំង​គ្រឿងញៀន តាម​តួនាទី​និង​ភារកិច្ច​រៀងៗ​ខ្លួន​។ ដូច្នេះ​ដើម្បី​ឆ្លើយតប​នឹង​ការណែនាំ​ខាងលើនេះ ក្រសួង​វប្បធម៌ និង​វិចិត្រសិល្ប​: នឹង​រៀបចំ​វគ្គ​បណ្តុះបណ្តាល​ដ៏​មាន​សារ​:​សំខាន់​នេះ ដោយ​គ្រោង​នឹង​អញ្ជើញ សិល្បករ សិល្បការិនី ដែលជា​អ្នករាំ អ្នក​សម្តែង អ្នកចម្រៀង តារាភាពយន្ត តារា​កំប្លែង ទាំង​ក្នុង​និង​ក្រៅ​ប្រព័ន្ធ សិស្ស និស្សិត មន្ត្រីរាជការ និង​តំណាង​មន្ទីរ​វប្បធម៌ និង​វិចិត្រសិល្ប​: ទាំង​២៥​រាជធានី​-​ខេត្ត ដែលមាន​ចំនួន​ប្រមាណ​ក្រោម​២០០​រូប​៕

ព័ត៌មានទាក់ទង