រដ្ឋតិចសាស់បានចោទប្រកាន់ Google ថាបានប្រមូលទិន្នន័យ និង ទីតាំងរបស់អ្នកប្រើប្រាស់ ទោះបីជាអ្នកប្រើបានបិទ Location Services ក៏ដោយ។ ក្នុងនោះ មានការប្រមូលព័ត៌មានជាសំឡេង និងរូបរាងមុខមាត់អ្នកប្រើ តាមកម្មវិធី Google Assistant និង Google Photos ដែលធ្វើឲ្យអ្នកប្រើប្រាស់យល់ច្រឡំអំពីភាពឯកជននៅក្នុង Incognito Mode នៃកម្មវិធី Chrome។ ទោះបីជាយល់ព្រមតាមលក្ខខណ្ឌនៃការសម្រេចបង់ប្រាក់ដូចខាងលើ តែ Google មិនទទួលស្គាល់ថាបានធ្វើខុសច្បាប់ទេ ពោលគឺក្រុមហ៊ុនមិនត្រូវបានបង្ខំឲ្យផ្លាស់ប្តូរកម្មវិធីរបស់ខ្លួនឡើយ។ Google បានបញ្ជាក់ថា ការសម្រេចនេះពាក់ព័ន្ធនឹង «ការចោទប្រកាន់ចាស់ៗ» ហើយក្រុមហ៊ុនបានធ្វើបច្ចុប្បន្នភាពគោលនយោបាយរួចរាល់ហើយ។ ក្រុមហ៊ុនបច្ចេកវិទ្យាយក្ស Google បានយល់ព្រមបង់ប្រាក់ ១.៣៧៥ពាន់លានដុល្លារដល់រដ្ឋតិចសាស់ ដើម្បីដោះស្រាយបណ្តឹង ដែលចោទប្រកាន់ថា ក្រុមហ៊ុនបានប្រមូលទិន្នន័យផ្ទាល់ខ្លួនរបស់អ្នកប្រើប្រាស់ដោយគ្មានការអនុញ្ញាត។ អាជ្ញារដ្ឋនេះ លោក Ken Paxton បានប្រកាសថា ការសម្រេចនេះជាការទូទាត់ប្រាក់ដ៏ធំបំផុតដែលរដ្ឋតែមួយសម្រេចបាន ចំពោះក្រុមហ៊ុន Google សម្រាប់ការបំពានលើទិន្នន័យឯកជនភាព។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី១០ ខែឧសភា ឆ្នាំ២០២៥។ គួរជម្រាបថា ការពិន័យជាទឹកប្រាក់ខាងលើនេះ ត្រូវបានគេចាត់ទុកថា ជាការសងប្រាក់ធំបំផុតដែលរដ្ឋតែ​មួយអាចសម្រេចបាន ចំពោះក្រុមហ៊ុនបច្ចេកវិទ្យាយក្សដូចជា Google។ ដូចគ្នានេះដែល ក្រុមហ៊ុន Meta ដែលជាម្ចាស់ Facebook និង Instagram បានយល់ព្រមកាលពីឆ្នាំមុន ដើម្បីបង់ប្រាក់ចំនួន ១.៤ ពាន់លានដុល្លារ ដើម្បីដោះស្រាយជាមួយលោក Paxton ជុំវិញការចោទប្រកាន់ថា ខ្លួនបានប្រមូល និងប្រើប្រាស់ទិន្នន័យសម្គាល់មុខដោយខុសច្បាប់៕

ព័ត៌មានទាក់ទង