រាជធានីភ្នំពេញ៖​អ្នកដឹកនាំចលនានេះ គឺលោក សែមស័ក្តិ សិនា និស្សិតបណ្ឌិត ជំនាញវិទ្យាសាស្ត្រនយោបាយ ជំនាន់៩ បានឲ្យដឹងថា ហត្ថលេខា មានការចូលរួមចុះដោយក្រុមនិស្សិតរាជបណ្ឌិត្យសភា ក្រុមនិស្សិតសាលាដទៃ ប្រជាពលរដ្ឋ មន្ត្រីក្រសួង/ស្ថាប័ននានា អង្គការ និងសមាគមជាច្រើនផងដែរ។ លោកបន្ថែមថា ការដាក់ញត្តិគ្រោងធ្វើនៅថ្ងៃទី៦ ខែសីហា ឆ្នាំ២០២៥ បើគ្មានការប្រែប្រួលទេ។ ក្រុមនិស្សិតនៃរាជបណ្ឌិត្យសភាកម្ពុជា ដែលបង្កើតចលនាប្រមូលហត្ថលេខា ដើម្បីដាក់ញត្តិទៅស្ថានទូតធំៗប្រចាំនៅកម្ពុជា ក្នុងគោលបំណងសុំអន្តរាគមន៍ឱ្យមានការដោះលែងទាហានកម្ពុជាទាំង ១៨រូប និងបង្ហាញគោលជំហរប្រឆាំងសង្រ្គាមឆ្លៀនពានរបស់សៀមមកលើកម្ពុជា បានប្រមូលហត្ថលេខា ១០២០រូប បន្ទាប់ពីបិទការបូកសរុបនៅម៉ោង៦៖៣០នាទីល្ងាច ថ្ងៃទី៥ ខែសីហា ឆ្នាំ២០២៥។ ការប្រមូលហត្ថលេខាដោយផ្ទាល់លើញត្តិ បានធ្វើឡើងនៅថ្ងៃទី០៥ ខែសីហា ឆ្នាំ២០២៥ ចាប់ពីម៉ោង ០៩៖០០ ព្រឹក ដល់ ១៧៖០០ល្ងាច នៅក្នុងអគារឥន្ទ្រទេវី រាជបណ្ឌិត្យសភាកម្ពុជា។ ព្រឹកមិញនេះ ឧបនាយករដ្ឋមន្ត្រី សុខ ចិន្តាសោភា ក៏បានអញ្ជើញចុះហត្ថលេខាលើញ្ញតិផងដែរ។ ការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់ចំណុចផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះបានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់។ កម្ពុជានិងថៃ បានឯកភាពដាក់ចេញបទឈប់បាញ់ជាបន្ទាន់ និងដោយឥតលក្ខខណ្ឌ ដែលចូលជាធរមាន នៅម៉ោង០០៖០០ ថ្ងៃទី២៩ ខែកក្កដា ឆ្នាំ២០២៥។ ប៉ុន្តែ ៨ម៉ោងក្រោយបទឈប់បាញ់ ទាហានថៃបានចូលមកចាប់ទាហានកម្ពុជាចំនួន១៨នាក់ ដល់លេណដ្ឋាន៕

ព័ត៌មានទាក់ទង