ខេត្តព្រះសីហនុ៖ ពិធីបិទសមយុទ្ធលើលំហសមយុទ្ធប្រព្រឹត្តទៅ ក្រោមអធិបតីភាពនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និង ឧត្តមសេនីយ៍ទោ លី ក្វាងយុន ឧបការីនាយសេនាធិការតំបន់ភូមិភាគខាងត្បូងនៃកងទ័ពរំដោះប្រជាជនចិន។ សមយុទ្ធលើផ្ទៃសមុទ្ររវាងកងទ័ពជើងទឹកកម្ពុជា និងកងទ័ពជើងទឹករំដោះប្រជាជនចិនសមយុទ្ធលើផ្ទៃសមុទ្ររវាងកងទ័ពជើងទឹកកម្ពុជា និងកងទ័ពជើងទឹករំដោះប្រជាជនចិន ក្រោមប្រធានបទ «ប្រតិបត្តិការរំដោះចំណាប់ខ្មាំងពីក្រុមភេរវករចាប់ជម្រិតនាវាដឹកទំនិញ» ធ្វើឡើងនៅខេត្តព្រះសីហនុ ត្រូវបានរៀបចំពិធីបិទនៅថ្ងៃទី២៦ ខែឧសភា ឆ្នាំ២០២៥នេះ ប្រកបដោយភាពជោគជ័យ និងការពង្រឹងកិច្ចសហប្រតិបត្តិការល្អរវាងកង័ពកម្ពុជា-ចិន។ តាមសេចក្តីរាយការណ៍របស់ប្រធានគណៈកម្មការដឹកនាំធ្វើសមយុទ្ធបានឱ្យដឹងថា សមយុទ្ធនេះនឹងត្រួសត្រាយផ្លូវធ្វើឱ្យកិច្ចសហប្រតិបត្តិការរវាងកងទ័ពនៃប្រទេសទាំងពីរកាន់តែប្រសើរឡើង ពិសេសការផ្លាស់ប្ដូរបទពិសោធន៍ការបង្កើនសមត្ថភាពលើប្រតិបត្តិការប្រើប្រាស់កម្លាំងមធ្យោបាយកងទ័ពជើងទឹកដើម្បីទប់ទល់និងបញ្ហាប្រឈមនានា រួមចំណែកក្នុងការថែរក្សាស្ថិរភាព និងការពារសន្តិភាពក្នុងតំបន់។ សមយុទ្ធនាគមាសកងទ័ពជើងទឹកលើកទី២ រវាងកងទ័ពជើងទឹកកម្ពុជា និងកងទ័ពចិន ធ្វើឡើងក្នុងរយៈពេល១៣ថ្ងៃ ចាប់ពីថ្ងៃទី១៤ដល់ថ្ងៃទី២៦ ឧសភា ឆ្នាំ២០២៥ ដោយមានការចូលរួមពីរកងទ័ពជើងទឹកកម្ពុជា-ចិន សរុប ៦៧៧ នាក់ ក្នុងនោះសមយុទ្ធជើងទឹកកងទ័ពប្រទេសទាំងពីរបានប្រើប្រាស់នាវាចំនួន១០ គ្រឿង កម្ពុជាមាននាវាចូលរួមចំនួន ៧គ្រឿង ឧទ្ធម្ភាគចក្រ១គ្រឿង, កងទ័ពចិនមាននាវាចំនួន ៣គ្រឿង និងឧទ្ធម្ភាគចក្រ ១គ្រឿង នៅក្នុងប្រតិបត្តិការរំដោះចំណាប់ខ្មាំងពីក្រុមភេរវករដែលចាប់ជម្រិតលើនាវាដឹកទំនិញ។ សមយុទ្ធជើងទឹកនេះ ធ្វើឡើងនៅតំបន់ច្រកចន្លោះកោះតាង និងកោះរុងសន្លឹម ក្នុងភូមិសាស្ត្រខេត្តព្រះសីហនុ ដោយចេញដំណើរពីកំពង់ផែមូលដ្ឋានកងទ័ពរាម ក្នុងចលនារូបភាពបំលាស់ទីមួយជួរបណ្តោយ ដើម្បីអនុវត្តយុទ្ធវិធីប្រតិបត្តិការទៅកាន់គោលដៅ។ តាមសេនារីយោនៃសមយុទ្ធនេះ ក្រុមភេរវករអន្តរជាតិបានជ្រៀតចូលតំបន់អាស៊ីអាគ្នេយ៍ ហើយមួយចំនួនបានចូលកាន់តំបន់កាប់សមុទ្រ និងទីប្រជុំជនក្នុងប្រទេសកម្ពុជាធ្វើជាទីតាំងលាក់ខ្លួន ព្រមទាំងបានធ្វើសកម្មភាពបំផ្ទុះភេរវកម្មជាញឹកញាប់ បង្កប្រជាពលរដ្ឋស្លាប់ និងរបួស។ ថ្មីៗនេះក្រុមភេរវករបានចាប់ខ្លួនបុគ្គលិកជនជាតិកម្ពុជា និងជនជាតិចិនជាច្រើននាក់ក្នុងក្រុមហ៊ុនវិនិយោគកម្ពុជា-ចិន មួយកន្លែង ហើយធ្វើសកម្មភាពវាយប្រហារ និងចាប់ជំរិតកប៉ាល់ស៊ីវិល ដោយប្រើប្រាស់អូប័រប្រដាប់អាវុធនៅដែនសមុទ្រកម្ពុជា ធ្វើឲ្យរំខានដល់វិស័យពាណិជ្ជកម្មដឹកជញ្ជូននៅដែនសមុទ្រកម្ពុជាយ៉ាងធ្ងន់ធ្ងរ។ ដើម្បីធានាសន្តិភាព ស្ថិរភាពក្នុងតំបន់ និងដើម្បីប្រយុទ្ធប្រឆាំងនឹងភេរវកម្មអន្តរជាតិនិយមយ៉ាងមុតមាំ ភាគីកម្ពុជាស្នើសុំជំនួយ យោធាអន្តរជាតិពីអង្គការសហប្រជាជាតិ ហើយក្រុមប្រឹក្សាសន្តិសុខអង្គការសហប្រជាជាតិក៏បានសម្រេច និងកំណត់ឱ្យភាគីចិនចាត់បញ្ជូនកម្លាំងយោធា សហការជាមួយភាគីកម្ពុជា បើកប្រតិបត្តិការរួមគ្នាប្រយុទ្ធប្រឆាំងក្រុមភេរវករខាងលើនៅតាមតំបន់ដីគោក និងលើដែនសមុទ្រមួយចំនួន។ ឆ្លងតាមការពិគ្រោះពិភាក្សារបស់ភាគីកម្ពុជា និងចិន បានឯកភាពបង្កើតទីបញ្ជាការកងកម្លាំងប្រឆាំងភេរវកម្មនៃកងទ័ពទាំងពីរ និងបែងចែកភារកិច្ចជូនកងឯកភាពរួមមាន ការរំដោះចំណាប់ខ្មាំងការបោសសម្អាតភេរវករ និងជំរុំលាក់ខ្លួនរបស់ភេរវករ។ តាមផែនការប្រតិបត្តិការកងទ័ពទាំងពីរកម្លាំងទ័ពភាគីចិនបានចូលកាន់ទីតាំងបម្រុងទុកក្នុងប្រទេសកម្ពុជាហើយនិងសហការជាមួយកម្លាំងទ័ពភាគីកម្ពុជា រៀបចំជាកងឯកភាពចម្រុះដើម្បីបើកប្រតិបត្តិការប្រឆាំងនឹងក្រុមភេរវករ។ សូមបញ្ជាក់ថា ឆ្នាំ២០២៥ ជាឆ្នាំទី២ ដែលកងទ័ពជើងទឹកកម្ពុជានិងចិនបានធ្វើសមយុទ្ធនាគមាសនេះឡើង ឱ្យឆ្នាំ២០២៥នេះ ក៏ជាឆ្នាំដែលធ្វើសមយុទ្ធនាគមាសលើកទី៧ រួមគ្នា រវាងកងទ័ពកម្ពុជានិងចិន មានកងទ័ពចូលរួមសរុបជាង ២,០០០ នាក់ អមដោយនាវាចម្បាំងចំនួន និងសម្ភារៈយោធាជាច្រើនទៀត បានចូលរួមធ្វើសមយុទ្ធនាគមាស ក្រោមប្រធានបទ "ប្រតិបត្តិការរួមគ្នាប្រឆាំងភេរវកម្មនិងការងារសង្គ្រោះមនុស្សធម៌" ។ ជាការកត់សម្គាល់ ការធ្វើសមយុទ្ធនាគមាសលើកទី៧ រវាងកងយោធពលខេមរៈភូមិន្ទនិងកងទ័ពរំដោះប្រជាជនចិន គឺមានទំហំធំជាងបណ្ដាឆ្នាំមុនៗ ធំជាងដោយសារមានការកើតឡើងនៃចំនួនកងទ័ពចូលរួម ព្រមទាំងពង្រីកកម្រិតធ្វើសមយុទ្ធលើផ្ទៃទឹកបន្ថែមទៀត ក្នុងនោះភាគីចិនបានប្រើប្រាស់នាវាបុកឡើងគោកប្រភេទ ០៧១, នាវាចម្បាំងប្រភេទ ០៥៦អា និងឧទ្ធម្ភាគចក្រ៕

ព័ត៌មានទាក់ទង